இஸ்ரேல் பிரதமர் பெஞ்சமின் நெதன்யாகுவுக்கு எதிராக ஈரானின் புரட்சிகர பாதுகாப்புப் படை கடும் எச்சரிக்கை விடுத்துள்ளது.
“குழந்தைகளை கொல்லும் இந்தக் குற்றவாளி நெதன்யாகு உயிருடன் இருந்தால், எங்களது முழு பலத்தையும் பயன்படுத்தி அவரைத் தொடர்ந்து தேடி சென்று கொல்வோம்” என ஈரான் புரட்சிகர பாதுகாப்புப் படை வெளியிட்ட அறிக்கையில் குறிப்பிடப்பட்டுள்ளது.
இந்நிலையில் மார்ச் 12ஆம் திகதி வெளியான ஒரு காணொளி சமூக வலைதளங்களில் பெரும் சர்ச்சையை ஏற்படுத்தியுள்ளது. அந்தக் காணொளியில் நெதன்யாகுவின் ஒரு கையில் ஆறு விரல்கள் இருப்பது போலத் தோன்றுவதாக சில இணையப் பயனர்கள் சுட்டிக்காட்டியுள்ளனர். இதனால், அது செயற்கை நுண்ணறிவு தொழில்நுட்பத்தின் மூலம் திருத்தப்பட்ட காணொளியாக இருக்கலாம் என்ற சந்தேகமும் எழுந்துள்ளது.
அந்தக் காணொளியில் 76வயதான நெதன்யாகு, ஈரான் மீது அமெரிக்கா மற்றும் இஸ்ரேல் மேற்கொண்ட வான்வழித் தாக்குதல்களுக்கு பின்னர் நடைபெற்ற தனது முதல் செய்தியாளர் சந்திப்பில் உரையாற்றியதாக தெரிவிக்கப்படுகிறது. அதில், ஈரானின் புதிய உயர் தலைவர் மோஜ்தபா கொமெய்னியை கொல்லப்போவதாக மறைமுகமாக எச்சரித்ததுடன், இஸ்ரேலிய இராணுவ நடவடிக்கைகளையும் அவர் நியாயப்படுத்தியிருந்தார்.
இதற்கிடையில் அமெரிக்க அரசியல் விமர்சகர் கேண்டஸ் ஓவன்ஸ் உள்ளிட்ட சிலர் “பிபி எங்கே?” என சமூக வலைதளங்களில் கேள்வி எழுப்பியுள்ளனர்.ஆனால், பெஞ்சமின் நெதன்யாகு உயிரிழந்ததாக பரவி வரும் தகவல்களை அவரது அலுவலகம் மறுத்துள்ளது. அவர் நலமாக உள்ளார் எனவும் அதிகாரப்பூர்வமாக தெரிவிக்கப்பட்டுள்ளது.
