ஈரான் மீது அமெரிக்கா முன்னெடுத்து வரும் “எபிக் ஃபியூரி” என்ற இராணுவ நடவடிக்கையின் போது, ஈரான் கடற்படையில் இருந்த ஒரு நீர்மூழ்கிக் கப்பல் உட்பட மொத்தம் 17 போர்க்கப்பல்கள் அழிக்கப்பட்டுள்ளதாக அமெரிக்கா அறிவித்துள்ளது.
அணு ஆயுதத் தடுப்பு ஒப்பந்தத்தில் கையெழுத்திட ஈரான் மறுத்ததைத் தொடர்ந்து, அமெரிக்கா மற்றும் இஸ்ரேல் படைகள் கடந்த மாதம் 28 ஆம் திகதி ஈரான் மீது தாக்குதலை ஆரம்பித்தன.
இதற்கு பதிலடி வழங்கிய ஈரான், அமெரிக்க இராணுவ முகாம்கள் உள்ள வளைகுடா நாடுகள் மீது தாக்குதல்கள் நடத்தி வருவதால் மத்திய கிழக்கு பிராந்தியத்தில் கடும் போர்ப்பதற்றம் நிலவி வருகிறது.இது தொடர்பாக “எபிக் ஃபியூரி” நடவடிக்கையை முன்னெடுத்து வரும் அமெரிக்க இராணுவ தளபதி அட்மிரல் பிராட் கூப்பர் ஊடகங்களுக்கு அளித்த பேட்டியில் தெரிவித்ததாவது:
இந்த நடவடிக்கையின் முதல் 100 மணிநேரங்களில் இதுவரை இல்லாத அளவில் மிகப்பெரிய தாக்குதல்கள் மேற்கொள்ளப்பட்டுள்ளன. ஈரான் மீது இருபத்துநான்கு மணிநேரமும் தாக்குதல் தொடர்கிறது. இதுவரை சுமார் 2,000 இலக்குகள் தாக்கப்பட்டுள்ளன. ஈரானின் வான் பாதுகாப்பு அமைப்பு கடுமையாக சேதமடைந்துள்ளது. நூற்றுக்கணக்கான ஏவுகணைகள் மற்றும் ஆளில்லா விமானங்களும் அழிக்கப்பட்டுள்ளன.
மேலும் ஈரான் கடற்படை முழுமையாக செயலிழக்கச் செய்யப்பட்டுள்ளதாகவும் அவர் தெரிவித்துள்ளார். ஈரான் கடற்படையில் ஒரு நீர்மூழ்கிக் கப்பல் உட்பட 17 போர்க்கப்பல்கள் இருந்ததாகவும், அவை அனைத்தும் மூழ்கடிக்கப்பட்டதாகவும் கூறப்பட்டுள்ளது.
சர்வதேச கப்பல் போக்குவரத்துக்கு இடையூறு விளைவித்ததாகக் கூறப்படும் ஈரானின் பல கடற்படை தளங்கள் மீது குண்டுவீச்சு விமானங்கள், போர்விமானங்கள் மற்றும் ஏவுகணைகள் மூலம் தாக்குதல் நடத்தப்பட்டதாகவும் தெரிவிக்கப்பட்டுள்ளது.
ஈரான் கடற்படையில் “மக்ரான்” எனப்படும் போர்க்கப்பல் ஒன்று இருந்தது. எண்ணெய் கப்பலை மாற்றியமைத்து போர்க்கப்பலாக பயன்படுத்தப்பட்ட இந்த கப்பல் ஹார்முஸ் நீரிணை பகுதியில் இருந்தபோது அமெரிக்க கடற்படையினரால் தாக்கப்பட்டு செயலிழக்கச் செய்யப்பட்டதாக கூறப்படுகிறது.
மேலும் “பகேரி” என்ற போர்க்கப்பல் கடந்த ஆண்டு ஈரான் கடற்படையில் இணைக்கப்பட்டிருந்தது. இதில் ஆளில்லா விமானங்களும் ஹெலிகாப்டர்களும் இருந்ததாக தெரிவிக்கப்படுகிறது. அந்தக் கப்பலும் அமெரிக்க கடற்படையினரால் தாக்கப்பட்டு மூழ்கடிக்கப்பட்டதாக கூறப்படுகிறது.அதேபோல் ஜமரான், சாஹந்த், சபாலன், பேயந்தர், நக்தே உள்ளிட்ட பல போர்க்கப்பல்களும் தாக்கப்பட்டு அழிக்கப்பட்டதாகவும் தகவல்கள் தெரிவிக்கின்றன.
ஈரானின் ஒரு நீர்மூழ்கிக்கப்பல் பந்தர் அப்பாஸ் பகுதியில் அமெரிக்க படையினரால் மூழ்கடிக்கப்பட்டதாகவும், “தரேக்” எனப்படும் நீர்மூழ்கிக் கப்பல் உட்பட பல சிறிய நீர்மூழ்கிப் படகுகளும் தாக்கப்பட்டதாகவும் கூறப்பட்டுள்ளது.இதனுடன், இந்தியாவின் விசாகப்பட்டினம் நகரில் நடைபெற்ற “மிலன் 2026” என்ற சர்வதேச கடற்படைப் பயிற்சியில் பங்கேற்று திரும்பிய ஈரானின் “தேனா” என்ற போர்க்கப்பல், இலங்கை அருகிலுள்ள இந்தியப் பெருங்கடல் பகுதியில் அமெரிக்க நீர்மூழ்கிக் கப்பலால் ஏவப்பட்ட டார்பிடோ குண்டுகளால் நேற்று அதிகாலை மூழ்கடிக்கப்பட்டதாக தகவல்கள் தெரிவிக்கின்றன.
இந்த தாக்குதலில் சுமார் 80 கடற்படை வீரர்கள் உயிரிழந்ததாகவும் தெரிவிக்கப்படுகிறது. சம்பவத்துக்குப் பிறகு இலங்கை கடற்படை மற்றும் விமானப்படை இணைந்து மீட்பு பணிகளை மேற்கொண்டதாகவும் கூறப்படுகிறது.ஈரான் கடற்படையில் இருந்த 17 போர்க்கப்பல்களும்அழிக்கப்பட்டுள்ளதாக அமெரிக்கா தெரிவித்துள்ள போதிலும், ஈரான் தரப்பில் இருந்து ஆளில்லா விமானங்கள் மற்றும் ஏவுகணைகள் மூலம் தொடர்ந்து பதிலடி தாக்குதல்கள் நடத்தப்பட்டு வருகின்றன.இதன் காரணமாக வளைகுடா நாடுகள் உட்பட மத்திய கிழக்கு முழுவதும் போர்ப்பதற்றம் தொடர்ந்து நிலவி வருகிறது.
