ஈரான் மீது அமெரிக்கா மேற்கொண்டு வரும் போர் நடவடிக்கைகளுக்கு பல ஆயிரம் கோடி ரூபாய் செலவாகும் என கணக்கிடப்பட்டுள்ளது. முதல் நாளில் மட்டும் சுமார் 21 ஆயிரம் கோடி ரூபாய் செலவு ஏற்பட்டதாக இராணுவ ஆய்வாளர்கள் தெரிவித்துள்ளனர்.அமெரிக்கா மற்றும் இஸ்ரேல் படைகள் ஈரானில் தொடர்ந்து தாக்குதல் நடத்தி வருகின்றன. போரின் ஒவ்வொரு நாளுக்கும் அமெரிக்க இராணுவத்துக்கு பல ஆயிரம் கோடி ரூபாய் செலவாகிறது.
அமெரிக்காவின் பிரவுன் பல்கலைக்கழகம் கடந்த ஆண்டு வெளியிட்ட அறிக்கையின்படி, 2023 அக்டோபர் முதல் 2025 வரை இஸ்ரேலுக்கு 21.7 பில்லியன் அமெரிக்க டாலர் இராணுவ உதவி வழங்கப்பட்டுள்ளது. ஒரு பில்லியன் டாலர் என்பது சுமார் 27 ஆயிரம் கோடி ரூபாய் ஆகும்.அதனைத் தவிர, யேமன், ஈரான் மற்றும் மத்திய கிழக்கு பகுதிகளில் இஸ்ரேலுக்கு ஆதரவாக மேற்கொள்ளப்பட்ட இராணுவ நடவடிக்கைகளுக்காக அமெரிக்க பட்ஜெட்டில் இருந்து 9.65 பில்லியன் முதல் 12 பில்லியன் டாலர் வரை செலவிடப்பட்டுள்ளதாகவும் தெரிவிக்கப்பட்டுள்ளது.
இதன் மூலம் கடந்த இரண்டு ஆண்டுகளில் இஸ்ரேலுக்கு வழங்கப்பட்ட மொத்த உதவி 31 பில்லியன் முதல் 33 பில்லியன் டாலர் வரை என கணிக்கப்பட்டுள்ளது.ஈரான் மீதான போர் தொடங்கிய முதல் 24 மணி நேரத்தில் மட்டும் அமெரிக்க இராணுவத்திற்கு 779 மில்லியன் டாலர் (சுமார் 21 ஆயிரம் கோடி ரூபாய்) செலவாகியுள்ளது.போருக்கான முன் ஏற்பாடுகளாக 630 மில்லியன் டாலர் செலவிடப்பட்டுள்ளதாகவும் தெரிவிக்கப்பட்டுள்ளது. போர்க்கப்பல்கள் அனுப்புதல், விமானங்களை தயார் நிலையில் வைத்திருத்தல், படையினரை நிலைநிறுத்துதல் ஆகியவற்றுக்கானசெலவுகள் இதில் அடங்கும்.
அமெரிக்காவின் மிகப்பெரிய விமானம் தாங்கி போர்க்கப்பலான “ஜெரால்ட் போர்ட்” இப்போரில் பயன்படுத்தப்படுகிறது. 4,600 படை வீரர்களை கொண்ட இந்தக் கப்பலுக்கு ஒரு நாளுக்கு சுமார் 6.5 மில்லியன் டாலர் செலவாகிறது.ஈரான் மீதான போர் காரணமாக அமெரிக்காவிற்கு குறைந்தபட்சம் 40 பில்லியன் டாலர் முதல் அதிகபட்சம் 115 பில்லியன் டாலர் வரை செலவாகலாம் என போர் நிபுணர்கள் மதிப்பிட்டுள்ளனர். போர் நீண்டால் இந்த செலவு 210 பில்லியன் டாலர் வரை உயர வாய்ப்புள்ளதாகவும் கூறப்படுகிறது.
அமெரிக்காவின் 2025ஆம் ஆண்டுக்கான இராணுவ பட்ஜெட் 850 பில்லியன் டாலர் ஆகும்.
