ஈரானின் மதத் தலைவர் அயத்துல்லா அலி காமேனியை இலக்கு வைத்து, இஸ்ரேலின் உளவு அமைப்பான மொசாத் பல ஆண்டுகளாக தீவிர கண்காணிப்பு மற்றும் தகவல் சேகரிப்பு நடவடிக்கைகளில் ஈடுபட்டதாக சர்வதேச ஊடகங்கள் செய்தி வெளியிட்டுள்ளன.
அந்த செய்திகளின்படி, தலைநகர் டெஹ்ரானில் உள்ள போக்குவரத்து கேமராக்கள் மற்றும் தொடர்பு அமைப்புகள் உள்ளிட்ட பல்வேறு தரவுகள் மூலம் காமேனியின் இயக்கங்கள் குறித்து தகவல்கள் சேகரிக்கப்பட்டதாக தெரிவிக்கப்படுகிறது.
அவர் அலுவலகத்திற்கு வருகை தரும் நேரம், பாதுகாப்பு ஏற்பாடுகள், அவருடன் இருப்போர் விவரங்கள் உள்ளிட்ட தகவல்கள் நீண்டகாலமாக திரட்டப்பட்டதாகவும் கூறப்படுகிறது.அத்துடன், கடந்த காலங்களில் ஈரானில் பணியாற்றிய அணுசக்தி விஞ்ஞானிகள் மற்றும் ராணுவ அதிகாரிகள் சிலர் ஒரே நேரத்தில் கொல்லப்பட்ட சம்பவங்களிலும் மொசாத் தொடர்புடையதாக பல்வேறு தகவல்கள் வெளியாகியுள்ளன.
இவை அனைத்தும் சர்வதேச ஊடகங்களில் வெளியான தகவல்களின் அடிப்படையில் தெரிவிக்கப்பட்டுள்ளன. அதிகாரப்பூர்வ தரப்பிலிருந்து இதுகுறித்து விரிவான விளக்கம் வெளியாகவில்லை என்பது குறிப்பிடத்தக்கது.
