இலங்கை விமானப்படை எதிர்வரும் 2026 மார்ச் 2ஆம் திகதி தனது 75வது ஆண்டு நிறைவை பெருமையுடன் கொண்டாட உள்ளது. இதற்காக அனைத்து ஏற்பாடுகளும் செய்யப்பட்டு, பத்தரமுல்ல அகுரேகொடையிலுள்ள விமானப்படை தலைமையகத்தில் உத்தியோகபூர்வ ஊடகவியலாளர் சந்திப்பு நடைபெற்றது.
இதில் விமானப்படை பிரதி தலைமைத் தளபதி எயர் வைஸ் மார்ஷல் ஜிஹான் செனவிரத்ன, பெண் ஊடகப் பேச்சாளர் ஸ்குவாட்ரன் லீடர் இவோன் விதாரண, மற்றும் விமானப்படை ஊடகப் பதிலாளர் விங் கமாண்டர் சஞ்சீவ் நாணயக்கார கலந்துகொண்டனர். பிரதி தலைமைத் தளபதி செனவிரத்ன, “வான்பரப்பினைப் பாதுகாப்போம்” என்ற குறிக்கோளுடன் கடந்த 75 ஆண்டுகளாக நாட்டிற்கு அர்ப்பணித்த சேவைகளையும், வரவிருக்கும் வைர விழா கொண்டாட்டங்களின் முக்கியத்துவத்தையும் விளக்கினார்.
1948 இல் இலங்கை சுதந்திரம் பெற்ற பிறகு 1951 மார்ச் 2ஆம் திகதி ராயல் சிலோன் விமானப்படை நிறுவப்பட்டது. தற்போதைய தளபதி எயர் மார்ஷல் பந்து எதிரிசிங்க வழிகாட்டுதலின்கீழ் பல பிரம்மாண்ட நிகழ்வுகள் ஏற்பாடு செய்யப்பட்டுள்ளன. அதில், 27வது விமானப்படை சைக்கிளோட்டப் போட்டி 2026 பெப்ரவரி 27, 28 மற்றும் மார்ச் 1-ஆம் திகதிகளில் நடைபெறும்; மார்ச் 7–9 ஆம் திகதிகளில் ரத்மலானை விமானப்படை தளத்தில் வான் சாகசங்கள் மற்றும் தொழில்நுட்பக் கண்காட்சி பொதுமக்களுக்காக நடக்கின்றது;
மேலும், மார்ச் 28ஆம் திகதி மாலை 7.00 மணிக்கு “சிம்பொனி ஆஃப் விங்ஸ்” இசை நிகழ்ச்சி கொழும்பு நெலும் பொகுணவில் உள்ள மஹிந்த ராஜபக்ஷ அரங்கில் நடக்கவுள்ளது. கடந்த 75 ஆண்டுகளாக இலங்கை மக்களைப் பாதுகாத்து வரும் விமானப்படை, எதிர்காலத்திலும் தாய்நாட்டிற்கான தனது கடமையை செவ்வனே நிறைவேற்றத் தயாராக உள்ளது என இந்த வைர விழா நிகழ்வுகள் தெரிவித்துள்ளன.
