நைஜீரியாவின் வடமேற்குப் பகுதியில் உள்ள நைஜர் மாநிலத்தில், மோட்டார் சைக்கிள்களில் வந்த ஆயுதமேந்திய கும்பல் நடத்திய அதிரடித் தாக்குதலில் குறைந்தது 29 பேர் உயிரிழந்துள்ளனர்.நேற்று முன்தினம் (14) அதிகாலை, சுமார் 41 மோட்டார் சைக்கிள்களில் வந்த கும்பல், தலா 2–3 நபர்களுடன் துங்கா-மேகேரி, கொன்கோசோ மற்றும் பிசா கிராமங்களில் புகுந்து சரமாரியாக துப்பாக்கிச் சூடு நடத்தியது.
இந்த தாக்குதலில் வீடுகள் தீயிட்டு கொளுத்தப்பட்டு, அடையாளம் தெரியாத மக்கள் கடத்தப்பட்டுள்ளனர். உயிருக்கு அஞ்சிய மக்கள் அருகிலுள்ள புதர்களுக்குள் ஓடி ஒளிந்ததால், கடத்தப்பட்டவர்களின் துல்லியமான எண்ணிக்கை இன்னும் உறுதி செய்யப்படவில்லை.உள்ளூர் மக்கள் தெரிவிப்பதாவது, இந்தக் கும்பலின் நோக்கம் கொள்ளை அல்ல; மக்களை கொன்று பயங்கரவாதத்தை ஏற்படுத்துவதே என்பதாகும்.
ஏற்கனவே இப்பகுதியில் ஜிஹாதி அமைப்புகளின் ஆதிக்கம் உள்ள நிலையில், இந்த தாக்குதல் பெரும் பதற்றத்தை உருவாக்கியுள்ளது.
இதனைத் தொடர்ந்து, அப்பகுதியில் இரவு 8 மணிக்குப் பிறகு மோட்டார் சைக்கிள் டாக்ஸிகள் இயக்கத் தடை விதிக்கப்பட்டு, பாதுகாப்புப் படையினரும் மீட்புப் பணிகளுக்காகக் குவிக்கப்பட்டுள்ளனர்.நைஜீரியாவில் அண்மைக்காலமாக அதிகரித்து வரும் இத்தகைய கடத்தல் மற்றும் கொலைச் சம்பவங்கள் அரசுக்கு பெரும் சவாலாக மாறியுள்ளன.
