நாட்டில் தேசிய திரைப்படப் பாடசாலையொன்றை நிறுவுவது தொடர்பில் கலை மற்றும் கலாசார விவகாரங்களுக்கான நாடாளுமன்ற மன்றம் கவனம் செலுத்தியுள்ளது.கலைகள் மற்றும் கலாசார அலுவல்கள் தொடர்பான நாடாளுமன்ற ஒன்றியத்தின் தலைவர், நாடாளுமன்ற உறுப்பினர் ஜகத் மனுவர்ண தலைமையில் நடைபெற்ற கூட்டத்திலேயே இவ்விவகாரம் தொடர்பில் விரிவாகக் கலந்துரையாடப்பட்டுள்ளது.
இக்கூட்டத்தில் வெகுசன ஊடக பிரதி அமைச்சர் (கலாநிதி) கௌஷல்யா ஆரியரத்ன கலந்து கொண்டதுடன், தேசிய திரைப்படப் பாடசாலை திரைப்படம் குறித்த கோட்பாட்டு அறிவை வழங்குவதுடன், நடைமுறை ரீதியாக திரைப்படங்களை உருவாக்கக் கூடிய திறமையான கலைஞர்களை உருவாக்கும் பாடநெறிகளை கொண்ட நிறுவனமாக அமைய வேண்டியதன் அவசியம் வலியுறுத்தப்பட்டது.
மேலும், சர்வதேச திரைப்படப் பாடசாலைகளின் தரநிலைகளுக்கு இணங்க இத்தகைய பாடசாலை பேணப்பட வேண்டியதன் முக்கியத்துவமும் இக்கூட்டத்தில் சுட்டிக்காட்டப்பட்டது.திரைப்படத் துறையின் வளர்ச்சிக்காக தேசிய திரைப்படப் பாடசாலையை நிறுவுவது தொடர்பில் நீண்டகாலமாகக் கலந்துரையாடப்பட்டு வந்த போதிலும், இதுவரை அது நடைமுறைப்படுத்தப்படவில்லை என்பதும் இங்கு கவனத்திற்கு கொண்டுவரப்பட்டது.
