2026 ஆம் ஆண்டுக்கான வரவு – செலவுத் திட்டத்தை எதிர்க்காத தமிழ்த் தரப்பினர், இன்று கிவுல் ஓயா திட்டத்துக்கு எதிராகக் கூக்குரலிடுகின்றனர் என்று தமிழ்த் தேசிய மக்கள் முன்னணியின் தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம் தெரிவித்தார்.
யாழ்ப்பாணத்தில் நேற்று நடத்திய ஊடக சந்திப்பிலேயே அவர் இதனைக் குறிப்பிட்டார்.
அவர் மேலும் தெரிவிக்கையில்,
“2026 வரவு – செலவுத் திட்டத்தையும், சிங்களக் குடியேற்றத்தையும் நல்லிணக்கம் என்ற போர்வையில் எதிர்க்காத தமிழ்த் தரப்பினர், இன்று கிவுல் ஓயா திட்டத்துக்கு எதிராகக் கூக்குரலிடுகின்றனர். ஆனாலும், அவர்கள் இன்று எதிர்ப்பு வெளியிடுவதை வரவேற்கின்றோம்.
மகாவலி எல் வலயத்துக்குள்ளேயே கிவுல் ஓயா திட்டமும் வருகின்றது. இந்தக் கிவுல் ஓயா திட்டம் தொடர்பில் அரசியல் இலாபம் எடுத்துகொள்வதற்காகவே தமிழரசுக் கட்சி இப்போது எதிர்ப்புத் தெரிவிக்கின்றது. மாகாண சபைத் தேர்தல் வரக்கூடும் என்பதற்காகவே அவர்கள் விழுந்தடித்து நடந்துகொள்கின்றார்கள். ஆகவே, இந்தக் கிவுல் ஓயா திட்டத்துக்கு எதிரான நடவடிக்கைகளை முன்னின்று மேற்கொள்ள சிவில் சமூகம் முன்வரவேண்டும். அதனையே நாங்களும் விரும்புகின்றோம். அவ்வாறான சந்தர்ப்பத்தில் எங்கள் ஆதரவும் அதற்கு இருக்கும்.” – என்றார்.
