இராமநாதபுரம் அருகே இலங்கைக்கு கடத்த முயன்ற சுமார் ரூ.90 இலட்சம் மதிப்பிலான 245 கிலோ பதப்படுத்தப்பட்ட தடை செய்யப்பட்ட கடலட்டைகளை சுங்கத்துறையினர் கைப்பற்றியுள்ளனர்.
கடத்தல்காரர் வாகனத்தை விட்டுவிட்டு தப்பியோடிய நிலையில் பொலிஸார் அவர்களை தேடி வருகின்றனர்.
இராமநாதபுரம் மாவட்டம், இலங்கைக்கு மிக அருகில் இருப்பதால் தமிழக கடல் வழியாக பீடி இலைகள், மஞ்சள், கடலட்டைகள், கடல் பல்லிகள், கஞ்சா உள்ளிட்ட பொருட்கள் சட்டவிரோதமாக கடத்தப்பட்டு வருகின்றன.
இதனைத் தடுக்க மத்திய, மாநில உளவுத்துறையினர், கடற்படை, கடலோர காவல்படை மற்றும் சுங்கத்துறையினர் தீவிர கண்காணிப்பில் ஈடுபட்டு வருகின்றனர்.
இந்நிலையில், மண்டபம் கடல் வழியாக நாட்டுப்படகில் இலங்கைக்கு பதப்படுத்தப்பட்ட தடை செய்யப்பட்ட கடலட்டைகள் கடத்தப்பட இருப்பதாக இராமநாதபுரம் சுங்கத்துறை அதிகாரிகளுக்கு இரகசிய தகவல் கிடைத்தது.
இதையடுத்து உச்சிப்புளி பேருந்து நிலையம் அருகே சுங்கத்துறையினர் வாகன சோதனையில் ஈடுபட்ட போது, சோதனையில் நிற்காமல் சென்ற சந்தேகத்திற்கிடமான வாகனத்தை அதிகாரிகள் துரத்திச் சென்றனர்.
பிரப்பன்வலசை அருகே கடற்கரை பகுதியில் உள்ள பனந்தோப்புக்குள் வாகனத்தை விட்டுவிட்டு அதன் ஓட்டுநர் தப்பியோடினார்.
இதையடுத்து வாகனத்தை சோதனையிட்ட அதிகாரிகள், அதில் மூட்டை மூட்டையாக பதப்படுத்தப்பட்ட கடலட்டைகள் இருப்பதை கண்டறிந்தனர்.
வாகனத்துடன் கடல் அட்டைகளை கைப்பற்றி இராமநாதபுரம் சுங்கத்துறை அலுவலகத்திற்கு கொண்டு சென்றனர். அங்கு எடைபோட்டதில் சுமார் 245 கிலோ தடை செய்யப்பட்ட பதப்படுத்தப்பட்ட கடல் அட்டைகள் இருந்தது தெரியவந்தது.
இதன் சர்வதேச சந்தை மதிப்பு சுமார் ரூ.90 இலட்சம் என சுங்கத்துறை அதிகாரிகள் தெரிவித்தனர்.
மேலும், தப்பியோடிய நபர் யார் என்பது குறித்து பறிமுதல் செய்யப்பட்ட வாகனத்தின் பதிவு எண்ணை வைத்து சுங்கத்துறையினர் தீவிர விசாரணை நடத்தி வருகின்றனர்.
