நவகமுவ பொலிஸ் பிரிவிற்குட்பட்ட கொரதோட்ட பகுதியில் நபர் ஒருவர் சுட்டுக்கொல்லப்பட்ட சம்பவம் தொடர்பாக இரு சந்தேகநபர்கள் நேற்று (19) ஞாயிற்றுக்கிழமை கைது செய்யப்பட்டுள்ளதாகப் பொலிஸார் தெரிவித்துள்ளனர்.
கடந்த 2026 ஜூலை 16ஆம் திகதி இடம்பெற்ற இந்தத் துப்பாக்கிச்சூட்டுச் சம்பவத்தில் ஒருவர் உயிரிழந்திருந்தார்.
இதனைத் தொடர்ந்து, ஹோமாகம பிராந்திய குற்றப்புலனாய்வுப் பணியகத்தின் உத்தியோகத்தர்கள் விசாரணைகளை முன்னெடுத்து வந்தனர்.
விசாரணைகளின் போது கிடைத்த இரகசியத் தகவல்களின் அடிப்படையில், நேற்று மாலை இரண்டு சந்தேகநபர்களும் கைது செய்யப்பட்டுள்ளனர்.
கைது செய்யப்பட்டவர்களில் ஒருவர் துப்பாக்கிச்சூடு நடத்தியவர்கள் பயணித்த மோட்டார் சைக்கிளைச் செலுத்தியவர் எனவும், மற்றையவர் குற்றச்செயலுக்கு உடந்தையாக செயல்பட்டவர் எனவும் தெரிவிக்கப்படுகிறது.
பியகம பொலிஸ் பிரிவின் தெல்கொட பகுதியிலும், நவகமுவ பொலிஸ் பிரிவின் வந்தூரமுல்ல பகுதியிலும் வைத்து இச்சந்தேகநபர்கள் கைது செய்யப்பட்டுள்ளனர்.
இக்கொலைச் சம்பவத்திற்குப் பயன்படுத்தப்பட்ட மோட்டார் சைக்கிளையும் பொலிஸார் கைப்பற்றியுள்ளதோடு, கைது செய்யப்பட்ட சந்தேகநபர்கள் 21 மற்றும் 29 வயதுடையவர்கள் எனவும், இவர்கள் ரணால மற்றும் பல்லம ஆகிய பகுதிகளைச் சேர்ந்தவர்கள் எனவும் பொலிஸார் தெரிவித்தனர்.
இச்சம்பவம் தொடர்பான மேலதிக விசாரணைகளில் ஹோமாகம பிராந்திய குற்றப்புலனாய்வுப் பணியகத்தினர் ஈடுபட்டு வருகின்றனர்.
