காஷ்மீரைச் சேர்ந்த பெண் தீவிரவாதி ஆசியா அன்ட்ராபிக்கு டெல்லி நீதிமன்றம் ஆயுள் தண்டனை விதித்துள்ளது. அவருடன் தொடர்புடைய இரு கூட்டாளிகளுக்கும் தலா 30 ஆண்டுகள் சிறைத்தண்டனை வழங்கப்பட்டுள்ளது.ஸ்ரீநகரைச் சேர்ந்த ஆசியா அன்ட்ராபி, ஆரம்பத்தில் ஒரு மத அமைப்பில் செயல்பட்டு வந்தவர்.
பின்னர் அதிலிருந்து விலகி தனித்துவமான அமைப்பொன்றை உருவாக்கி, காஷ்மீரை இந்தியாவிலிருந்து பிரிக்க வேண்டும் என்ற நோக்கில் பல்வேறு செயல்பாடுகளில் ஈடுபட்டதாகக் கூறப்படுகிறது.
அவரது செயல்பாடுகளில், வெளிநாட்டு ஆதரவுடன் செயல்படும் தீவிரவாத குழுக்களுடன் தொடர்பு வைத்திருந்தது மற்றும் நாட்டின் அமைதியை பாதிக்கும் நடவடிக்கைகளில் ஈடுபட்டது போன்ற குற்றச்சாட்டுகள் முன்வைக்கப்பட்டுள்ளன.
1990களிலிருந்து பல்வேறு வழக்குகளில் கைது செய்யப்பட்டு வந்த அவர், 2018ஆம் ஆண்டு சட்டவிரோத நடவடிக்கைகள் தடுப்பு சட்டத்தின் கீழ் மீண்டும் கைது செய்யப்பட்டார். அதே வழக்கில் அவரது கூட்டாளிகளும் கைது செய்யப்பட்டனர்.இந்த வழக்கை விசாரித்த டெல்லி கூடுதல் அமர்வு நீதிமன்றம், முன்னதாகவே மூவரையும் குற்றவாளிகள் என அறிவித்திருந்த நிலையில், தற்போது தண்டனையை அறிவித்துள்ளது.
