திண்டுக்கல் மாவட்டம், கொடைக்கானலில் உள்ள பேரிஜம் ஏரி பகுதியில் யானைகள் நடமாட்டம் இருப்பதால் இன்று (திங்கட்கிழமை, மார்ச் 23) காலை முதல் மறு அறிவிப்பு வரும் வரை சுற்றுலா பயணிகள் செல்ல தடை விதிக்கப்பட்டுள்ளது.
பேரிஜம் ஏரி பாதுகாக்கப்பட்ட வனப்பகுதியில் அமைந்துள்ளது. எனவே, வனத்துறையினரிடமிருந்து அனுமதி பெற்றே சுற்றுலாப் பயணிகள் அங்கு செல்ல முடியும். ஏரிக்கு செல்லும் வழியில் தொப்பி தூக்கிப் பாறை, மதிகெட்டான் சோலை, வியூ பாயிண்ட், அமைதி பள்ளத்தாக்கு போன்ற இடங்களையும் பார்க்கலாம்.
வனத்துறையினர் தெரிவித்ததாவது, “நேற்று (மார்ச் 22) பிற்பகல் பேரிஜம் ஏரி பகுதியில் யானை நடமாட்டம் இருப்பது கண்டறியப்பட்டது. இதனால் பாதுகாப்பு காரணமாக சுற்றுலா பயணிகள் அங்கு செல்வதை தடை செய்துள்ளோம். யானைகள் இடம் பெயர்ந்து வனப்பகுதிக்குள் சென்றதும் பயணிகள் அனுமதிக்கப்படுவார்கள்,” என்று கூறினர்.
