சமையல் எரிவாயு விநியோகத்தில் சில சிக்கல்கள் இருந்தாலும், நாட்டில் தட்டுப்பாடு இல்லை என மத்திய அரசு விளக்கம் அளித்துள்ளது.
உலகில் இரண்டாவது பெரிய சமையல் எரிவாயு நுகர்வு நாடாக இந்தியா திகழ்கிறது. நாட்டில் பயன்படுத்தப்படும் எரிவாயுவில் பெரும்பாலானவை மேற்கு ஆசியப் பிராந்தியத்திலிருந்து கடல் வழியாக கொண்டு வரப்படுகின்றன. தற்போது அந்தப் பகுதியில் நிலவும் போர்ப் பதற்றம் காரணமாக கடல் போக்குவரத்தில் இடையூறுகள் ஏற்பட்டுள்ளன.
இந்த சூழ்நிலையில் சமையல் எரிவாயு தட்டுப்பாடு ஏற்படும் என்ற அச்சம் மக்கள் மத்தியில் உருவாகியுள்ளது. இதனால் வழக்கத்தைவிட அதிகமாக சுமார் 88 லட்சம் பேர் முன்பதிவு செய்துள்ளதாக மத்திய பெட்ரோலிய அமைச்சகத்தின் உயர் அதிகாரி ஒருவர் தெரிவித்துள்ளார்.இதன் காரணமாக விநியோகத்தில் சிரமம் ஏற்பட்டுள்ளதாலும், எந்த விநியோக நிலையத்திலும் எரிவாயு இருப்பு தீர்ந்துவிடவில்லை எனவும் அவர் குறிப்பிட்டார்.
தேவைப்படும் நேரங்களில் மட்டும் பொதுமக்கள் சிலிண்டர்களை முன்பதிவு செய்ய வேண்டும் என்றும் தேவையற்ற அச்சத்தால் அதிகப்படியான முன்பதிவுகளைத் தவிர்க்க வேண்டும் என்றும் அதிகாரிகள் கேட்டுக்கொண்டுள்ளனர்.
மேலும் எண்ணெய் நிறுவனங்களிடம் கச்சா எண்ணெய் இருப்பு போதுமான அளவில் உள்ளதால் பெட்ரோல் மற்றும் டீசலுக்கும் தட்டுப்பாடு ஏற்படாது என தெரிவிக்கப்பட்டுள்ளது.
அதேவேளை, வர்த்தக சிலிண்டர் விநியோகத்துக்கான முடிவுகள் மாநில அரசுகளுடன் கலந்தாலோசித்து மேற்கொள்ளப்படும் என்றும் சிலிண்டர்களை கள்ளச் சந்தையில் விற்பனை செய்வதைத் தடுக்க தொடர்ச்சியாக சோதனைகள் மேற்கொள்ளப்படுகின்றன என்றும் அதிகாரிகள் தெரிவித்துள்ளனர்.மார்ச் 13 ஆம் திகதி மட்டும் எண்ணெய் நிறுவன அதிகாரிகள் ஆயிரத்திற்கும் மேற்பட்ட இடங்களில் திடீர் சோதனைகள் நடத்தியதாகவும் தெரிவிக்கப்பட்டுள்ளது.
