வீண் பதற்றம் வேண்டாம் என மத்திய, மாநில அரசாங்கம் கூறியும், தமிழகத்தின் பல எரிபொருள் நிலையங்களில் மக்கள் மூன்றாவது நாளாக வரிசைகளில் காத்திருக்கின்றனர்.
ஈரானுக்கு எதிராக இஸ்ரேல் மற்றும் அமெரிக்கா நடத்தி வரும் போர் காரணமாக மேற்கு ஆசிய நாடுகளில் தொடர்ந்து பதற்றம் நிலவி வருகிறது.இதன் காரணமாக தமிழகத்தில் எரிபொருளுக்கு தட்டுப்பாடு ஏற்படக்கூடும் என்ற வதந்திகள் பரப்பப்பட்டுள்ளன.
இந்தநிலையில் பெட்ரோல், டீசல் தட்டுப்பாடு ஏற்படக்கூடும் என்ற தகவல் காட்டுத்தீ போல் தமிழகம் முழுவதும் பரவியது.இதன்காரணமாக தமிழகம் முழுவதும் 3-வது நாளாக இன்றும் பல்வேறு இடங்களில் பெட்ரோல் நிலையங்களில் வாகன சாரதிகள்; அலைமோதி வருகின்றனர்.
சென்னையில் தியாகராயநகர், அண்ணாநகர், மாம்பலம், இராயப்பேட்டை உள்ளிட்ட முக்கிய வீதிகளில் உள்ள பெட்ரோல் நிலையங்களில் வாகன சாரதிகள் முந்தியடித்துக் கொண்டு தங்களது வாகனங்களுக்கு பெட்ரோல் நிரப்பினர்.
வாகன சாரதிகள்; தங்களது வாகனத்தின் எரிபொருள் தாங்கியை முழுமையாக நிரப்பி கொண்டனர்.இதுதவிர குடிநீர் கேன், போத்தல்களிலும் பெட்ரோல், டீசல் வாங்கி சென்றனர்.எரிபொருள், டீசல் தட்டுப்பாடு இல்லை எனவும் எனவே மக்கள் அச்சப்படத்தேவையில்லை எனவும் இந்திய மத்திய, மாநில அரசுகள் முன்னதாக தெரிவித்திருந்தன.
தமிழகமெங்கும் பெட்ரோல், டீசலுக்கு தட்டுப்பாடு இல்லை என்றும் விநியோகம் சீராக நடைபெற்று வருவதாகவும் எண்ணெய் நிறுவன அதிகாரிகள் அறிவித்துள்ள நிலையிலேயே மக்கள் வரிசையில் காத்திருக்கின்றனர்.
