நீலகிரி மாவட்டம் கோடநாடு பகுதியில் இடம்பெற்ற கொலை மற்றும் கொள்ளைச் சம்பவம் தொடர்பான வழக்கின் விசாரணை இன்னும் நிறைவு செய்யப்படாததற்கான காரணத்தை சிபிசிஐடி அதிகாரிகளிடம் நீதிபதி கேள்வி எழுப்பியுள்ளார்.மறைந்த முன்னாள் முதல்வர் ஜெயலலிதா மற்றும் அவரது தோழி சசிகலா ஆகியோருக்குச் சொந்தமான தேயிலைத் தோட்டம் நீலகிரி மாவட்டத்தின் கோடநாடு பகுதியில் அமைந்துள்ளது.
அந்தத் தோட்டத்தில் கடந்த 2017ஆம் ஆண்டு ஏப்ரல் மாதம் 23ஆம் திகதி காவலாளியை கொலை செய்த கும்பல், பங்களாவில் இருந்த சில முக்கிய ஆவணங்களை கொள்ளையடித்து சென்றதாக தெரிவிக்கப்படுகிறது.இந்தச் சம்பவம் தொடர்பாக முக்கிய சந்தேகநபரான சயான் உள்ளிட்ட 10 பேரை பொலிஸார் கைது செய்திருந்தனர். சம்பவம் தொடர்பான வழக்கு தற்போது ஊட்டி ஒருங்கிணைந்த நீதிமன்றத்தில் விசாரணையில் உள்ளது.
திமுக ஆட்சி பொறுப்பேற்றதையடுத்து, மேற்கு மண்டல ஐஜி தலைமையில் ஐந்து தனிப்படைகள் அமைக்கப்பட்டு விசாரணை தீவிரப்படுத்தப்பட்டது. இதன்போது, வழக்கில் தடயங்களை அழித்ததாக கனகராஜின் சகோதரர் தனபால் மற்றும் உறவினர் ரமேஷ் ஆகியோர் கைது செய்யப்பட்டனர். மேலும் 316 பேரிடம் மறுவிசாரணையும் மேற்கொள்ளப்பட்டது.
பின்னர், இந்த வழக்கு சிபிசிஐடி விசாரணைக்காக மாற்றப்பட்டது. சிபிசிஐடி அதிகாரிகள் பல்வேறு கட்டங்களில் சந்தேகநபர்களுக்கு சம்மன் அனுப்பி விசாரணை மேற்கொண்டு வருகின்றனர்.இந்த வழக்கு நேற்று ஊட்டி ஒருங்கிணைந்த நீதிமன்றத்தில் விசாரணைக்கு எடுத்துக்கொள்ளப்பட்டது. அரசு தரப்பு வழக்கறிஞர் கனகராஜ், சிபிசிஐடி ஏடிஎஸ்பி முருகவேல் தலைமையிலான பொலிஸார் மற்றும் குற்றம் சாட்டப்பட்டவர்களில் ஒருவரான வாளையார் மனோஜ் ஆகியோர் நீதிமன்றத்தில் முன்னிலையாகினர்.
இதன்போது, வழக்கின் விசாரணை இன்னும் நிறைவு செய்யப்படாததற்கான காரணத்தை நீதிபதி முரளிதரன் கேள்வி எழுப்பினார். அதற்கு பதிலளித்த அதிகாரிகள், இதுவரை 269 சாட்சிகளிடம் விசாரணை மேற்கொள்ளப்பட்டுள்ளதாக தெரிவித்தனர்.
மேலும், வழக்கு தொடர்பான கைப்பேசி உரையாடல்கள் மற்றும் தகவல் பரிமாற்றங்கள் குறித்த ஆய்வறிக்கையை குஜராத்தில் உள்ள பிஎஸ்என்எல் ஆய்வகத்திடம் கோரியுள்ளதாகவும், அந்த அறிக்கை இன்னும் கிடைக்காத காரணத்தினால் விசாரணை தாமதமாகி வருவதாகவும் தெரிவித்தனர்.இதனைத் தொடர்ந்து, வழக்கு விசாரணையை எதிர்வரும் ஏப்ரல் 24ஆம் திகதி வரை ஒத்திவைக்க நீதிபதி உத்தரவிட்டார்.
