இந்திய கடற்படை நேற்று வெளியிட்ட அறிக்கையின் படி, கடந்த 4 ஆம் தேதி அதிகாலை ஈரானின் போர்க்கப்பல் “ஐஆர்ஐஎஸ் டேனா” விலிருந்து அவசர உதவி கோரி கொழும்பு கடல்சார் மீட்பு ஒருங்கிணைப்பு மையத்துக்கு தகவல் அனுப்பப்பட்டதாக தெரிவிக்கப்பட்டுள்ளது.இலங்கையின் காலே கடற்பரப்பில் இருந்து சுமார் 20 கடல் மைல் தொலைவில் அந்த ஈரான் போர்க்கப்பல் கடலில் மூழ்கியதாகவும், அது இலங்கை கடல் எல்லைக்குள் உள்ள பகுதி எனவும் கூறப்பட்டுள்ளது.
இந்த தகவல் கிடைத்தவுடன் இந்திய கடற்படை உடனடியாக மீட்புப் பணியை ஆரம்பித்ததாகவும், “ஐஎன்எஸ் தரங்கிணி” என்ற கப்பல் சம்பவ இடத்துக்கு அனுப்பப்பட்டதாகவும் தெரிவிக்கப்பட்டுள்ளது. அதேவேளை, கொச்சியில் இருந்து “ஐஎன்எஸ் இக்சாக்” என்ற கப்பலும் மீட்புப் பணிக்காக அனுப்பப்பட்டதாக குறிப்பிடப்பட்டுள்ளது.
இலங்கை கடற்படையுடன் இணைந்து இந்திய கடற்படையும் மீட்புப் பணியில் ஈடுபட்டுள்ளதாகவும், இந்திய கடற்படையின் கண்காணிப்பு விமானம் சம்பவ இடத்துக்கு விரைந்து சென்று கடலில் இருந்தவர்களுக்கு உயிர் காக்கும் மேலங்கிகளை வீசியதாகவும் தெரிவிக்கப்பட்டுள்ளது.இலங்கை கடற்படையுடன் இணைந்து தொடர்ந்து மீட்புப் பணிகள் மேற்கொள்ளப்பட்டு வருவதாக இந்திய கடற்படை அறிவித்துள்ளது.
