ஸ்ரீநகர் மத்திய சிறையின் கண்காணிப்பாளராக முதன்முறையாக ஒரு பெண் அதிகாரி நியமிக்கப்பட்டுள்ளார்.
ஜம்மு காஷ்மீர் மாநிலத்தில் உள்ள பல்வேறு சிறைகளுக்கு நான்கு அதிகாரிகள் கண்காணிப்பாளர்களாக நியமிக்கப்பட்டுள்ளனர். இந்நியமனத்தின்படி, ஸ்ரீநகர் மத்திய சிறையின் பொறுப்பு 2012 ஆம் ஆண்டு பேட்ச் அதிகாரி சபா ஷாலுக்கு வழங்கப்பட்டுள்ளது.
முன்னதாக, அவர் ஜம்மு காஷ்மீர் சிறைகள் துறை தலைமை இயக்குநர் அலுவலகத்தில் பணியாளர் அதிகாரியாக பணியாற்றியுள்ளார். மேலும், மக்கள் தொடர்பு அதிகாரியாகவும் சேவையாற்றிய அனுபவம் பெற்றுள்ளார்.ஸ்ரீநகரின் பிர் பாக் பகுதியில் வசிக்கும் சபா ஷால், சமூகப் பணியில் முதுகலைப் பட்டம் பெற்றுள்ளார். 2012 ஆம் ஆண்டு காஷ்மீர் அரசுப் பணிகள் தேர்வாணையத் தேர்வில் தேர்ச்சி பெற்றார்.
அவரை அறிந்த அதிகாரிகள், அவர் அனுபவமுள்ள, திறமையான அதிகாரி எனப் பாராட்டியுள்ளனர். இருப்பினும், இது அவருக்கு சவாலான பணியாக இருக்கும் என்றும், சிறைத் துறையில் உள்ள அனுபவம் அவருக்கு உதவும் என்றும் நம்பிக்கை தெரிவித்துள்ளனர்.
ஸ்ரீநகர் மத்திய சிறை, ஜம்மு காஷ்மீரின் பழமையான சிறைகளில் ஒன்றாகும். இங்கு அரசியல் கைதிகள் உட்பட 900-க்கும் மேற்பட்டோர் தடுத்து வைக்கப்பட்டுள்ளனர்.
இந்தச் சிறைக்கு காவல் துறையுடன் மத்திய தொழிலக பாதுகாப்புப் படையும் பாதுகாப்பு வழங்கி வருகின்றது.
கடந்த காலங்களில் வெளிநாட்டு தீவிரவாதிகள் மற்றும் பிரிவினைவாத தலைவர்கள் பலரும் இச்சிறையில் அடைக்கப்பட்டிருந்தனர். பின்னர் அவர்களில் பலர் ஜம்மு உள்ளிட்ட நகரங்களில் உள்ளபிற சிறைகளுக்கு மாற்றப்பட்டனர்.
