அமெரிக்காவின் தாக்குதல் குறித்து பிரதமர் மோடி மௌனம் காப்பது நடுநிலையானது அல்ல – சோனியா காந்தி குற்றச்சாட்டு!
அமெரிக்கா மற்றும் இஸ்ரேல் படைகளால் குறிவைக்கப்பட்ட ஈரானின் உச்சத் தலைவர் அயத்துல்லா அலி கமேனி கொல்லப்பட்ட விவகாரத்தில், இந்திய மத்திய அரசு மௌனம் காப்பது நடுநிலையான நிலைப்பாடு அல்ல எனவும், இது ஒரு பொறுப்புத் துறப்பு எனவும் இந்திய பாராளுமன்ற காங்கிரஸ் குழுத் தலைவர் சோனியா காந்தி குற்றஞ்சாட்டியுள்ளார்.
இது நாட்டின் வெளிநாட்டு கொள்கையின் நம்பகத்தன்மையை கேள்விக்குறியாக்கியுள்ளதாகவும் அவர் தெரிவித்துள்ளார்.
மேற்காசிய பிராந்தியத்தில் ஈரான் மீது இஸ்ரேல் உடன் இணைந்து அமெரிக்கா நடத்திய தாக்குதல்களில் கமேனி கொல்லப்பட்டதைத் தொடர்ந்து, அந்தப் பகுதியில் போர் பதற்றம் அதிகரித்துள்ளது. ஈரானும் பதிலடி நடவடிக்கைகளை மேற்கொண்டு வருகின்றது.
இது தொடர்பாக ஆங்கில நாளிதழில் வெளியிடப்பட்ட கட்டுரையில் சோனியா காந்தி தனது கருத்துகளை பதிவு செய்துள்ளார். ஈரானின் இறையாண்மை மீறப்பட்டதையோ அல்லது இந்த கொலைச் சம்பவத்தையோ மத்திய அரசு இதுவரை கண்டிக்காதது கவலைக்குரியது எனவும் அவர் குறிப்பிட்டுள்ளார்.
பாராளுமன்ற வரவு–செலவு கூட்டத்தொடரின் இரண்டாவது அமர்வில் இந்த விவகாரம் குறித்து விவாதிக்க வேண்டும் என்றும், மத்திய அரசு தனது நிலைப்பாட்டை தெளிவுபடுத்த வேண்டும் என்றும் அவர் வலியுறுத்தியுள்ளார்.மேலும், தாக்குதலைத் தொடங்கிய அமெரிக்கா மற்றும் இஸ்ரேல் குறித்து பிரதமர் குறிப்பிடாத நிலையில், ஈரான் மேற்கொண்ட பதில் தாக்குதலை மட்டும் கண்டித்திருப்பது சம்பிரதாயமான அணுகுமுறை எனவும் அவர் விமர்சித்துள்ளார்.
ஒரு வெளிநாட்டு தலைவர் கொல்லப்பட்ட சம்பவம் தொடர்பில், இறையாண்மை மற்றும் சர்வதேச சட்டங்களின்அடிப்படையில் இந்தியா தனது நிலைப்பாட்டை தெளிவாக அறிவித்திருக்க வேண்டும் எனவும், அதற்கான நடவடிக்கை எடுக்கப்படாதது வெளிநாட்டு கொள்கையின் நம்பகத்தன்மையை பாதிப்பதாகவும் சோனியா காந்தி தெரிவித்துள்ளார்.
