வரவிருக்கும் மாநிலங்களவைத் தேர்தலில் பீகார் மாநிலத்தில் நிதிஷ் குமார் தலைமையிலான ஐக்கிய ஜனதா தளம் கட்சி இரண்டு இடங்களில் வெற்றி பெறும் நிலை காணப்படுகிறது.அவற்றில் ஒன்றில் மத்திய அமைச்சர் ராம்நாத் தாக்கூர் போட்டியிடுவது உறுதியாகியுள்ளது. மற்றொரு இடத்திற்கான வேட்பாளர் இன்னும் அறிவிக்கப்படவில்லை.
இந்நிலையில் நிதிஷ் குமார் முதல்வர் பதவியில் இருந்து விலகி மாநிலங்களவைத் தேர்தலில் போட்டியிடக்கூடும் என அரசியல் வட்டாரங்களில் தகவல்கள் வெளியாகியுள்ளன.அதேவேளை அவரது மகன் நிஷாந்த் குமார் துணை முதல்வராக பொறுப்பேற்கலாம் என்றும், பாரதிய ஜனதா கட்சியைச் சேர்ந்த ஒருவர் புதிய முதல்வராக பதவியேற்கலாம் என்றும் கூறப்படுகிறது.இதுதொடர்பாக பாரதிய ஜனதா கட்சி மற்றும் ஐக்கிய ஜனதா தளம் கட்சியின் உயர்மட்ட தலைவர்களுக்கிடையில் ரகசிய ஆலோசனைகள் நடைபெற்று வருவதாக தகவல்கள் தெரிவிக்கின்றன.
நிதிஷ் குமாரை முதல்வர் பதவியில் இருந்து மாற்றும் முயற்சி 2025 ஆம் ஆண்டு சட்டப்பேரவைத் தேர்தலுக்கு முன்னரே எதிர்பார்க்கப்பட்டதாக கூறப்படுகிறது.எனினும், நிதிஷ் குமார் முன்னெடுத்த வளர்ச்சி நடவடிக்கைகளை கருத்தில் கொண்டு அந்த முடிவு அவசரமாக எடுக்கப்படவில்லை.75 வயதான நிதிஷ் குமார் பத்து முறை பீகார் மாநிலத்தின் முதல்வராக பதவி வகித்து சாதனை படைத்துள்ளார்.
பீகாரில் தேசிய ஜனநாயக கூட்டணி அல்லது மகா கூட்டணி எதனுடன் இருந்தாலும் தேர்தல் பிரச்சாரத்தை முன்னின்று வழிநடத்தியவர் என்றும் கூறப்படுகிறது.கடந்த 2025 ஆம் ஆண்டு அவரது அரசுக்கு எதிராக எதிர்ப்பலை எழுந்ததாக கூறப்பட்டபோதிலும், பெண்களுக்குநிதியுதவி, மாணவிகளுக்கு மிதிவண்டி வழங்குதல், மதுபானத் தடைவிதி போன்ற திட்டங்களின் மூலம் அவர் மீண்டும் ஆட்சியை கைப்பற்றியதாக தெரிவிக்கப்படுகிறது.
மாநிலங்களவைத் தேர்தலுக்கான வேட்பு மனு தாக்கல் செய்ய இன்றே இறுதி நாளாக இருப்பதால், இந்தத் தேர்தலில் நிதிஷ் குமார் போட்டியிடுகிறாரா இல்லையா என்பது இன்று தெளிவாகும் என எதிர்பார்க்கப்படுகிறது.
