தமிழ் நாகரிகத்தின் தொன்மை இந்தியாவுக்கு ஊறு விளைவிப்பதல்ல; மாறாக இந்தியாவின் நாகரிகப் பண்பாட்டிற்கு பெருமை சேர்ப்பதாகும். அதற்கான அகழ்வாராய்ச்சிகளுக்கு ஒப்புதல் வழங்க வேண்டும் என தமிழக முதல்வர் மு.க. ஸ்டாலின் வலியுறுத்தியுள்ளார்.இது தொடர்பாக அவர் தனது சமூக வலைதளப் பதிவில் தெரிவித்ததாவது:
கீழடி, ஆதிச்சநல்லூர், நாகப்பட்டினம் உள்ளிட்ட எட்டு இடங்களில் அகழ்வாராய்ச்சி மேற்கொள்ள மத்திய அரசின் ஒப்புதல் கோரி தமிழ்நாடு அரசு கடிதம் அனுப்பி எட்டு மாதங்கள் ஆகின்றன. ஜூலை 2025-இல் முன்மொழிவுகள் அனுப்பப்பட்டதுடன், நவம்பர் மாதம் இந்திய தொல்லியல் துறையின் தலைவர் தலைமையில் நடைபெற்ற கூட்டத்திலும் இவை எடுத்துக்கொள்ளப்பட்டன.
எனினும் இதுவரை அனுமதி வழங்கப்படவில்லை.தமிழ்நாட்டில் அகழ்வாராய்ச்சிக்கான ஏற்ற காலம் ஜனவரி முதல் ஜூலை வரை மட்டுமே. இந்த காலத்தைத் தவறவிட்டால் பருவமழையால் களப்பணிகள் பாதிக்கப்படும், முக்கிய ஆய்வுகள் தாமதமாகும், 2025–2026 நிதி ஒதுக்கீடும் பயனற்றதாகிவிடும்.
எனவே, மீண்டும் மீண்டும் கோரிக்கை விடுக்கப்பட்டும் ஏன் அனுமதி வழங்கப்படவில்லை என்பது குறித்து கேள்வி எழுப்பியுள்ள முதல்வர், தமிழ் நாகரிகத்தின் வரலாற்று உண்மைகள் வெளிப்படுவதால் யாருக்கும் பாதிப்பு இல்லை எனத் தெரிவித்துள்ளார்.
“அகழ்வாராய்ச்சிக்கு உடனடி ஒப்புதல் வழங்குங்கள்; வரலாறு பேசட்டும்” என அவர் வலியுறுத்தியுள்ளார்.
