அமெரிக்கா மற்றும் இஸ்ரேல் நடத்திய தாக்குதலில் அயத்துல்லா அலி காமேனி உயிரிழந்ததாக வெளியான தகவலைத் தொடர்ந்து, கர்நாடகா மாநிலத்தில் உள்ள அலிப்பூர் கிராமத்தில் துக்க அஞ்சலி நிகழ்வுகள் இடம்பெற்றுள்ளன.சிக்கபள்ளாப்பூர் மாவட்டத்தில் அமைந்துள்ள அலிப்பூரில் 30,000-க்கும் அதிகமான ஷியா முஸ்லிம்கள் வசித்து வருகின்றனர்.
அயத்துல்லா அலி காமேனி 1980 மற்றும் 1981 ஆம் ஆண்டுகளில் இக்கிராமத்திற்கு இருமுறை வருகை தந்ததாக தெரிவிக்கப்படுகிறது. அப்போதைய வருகையின் போது, அங்குள்ள மக்களுக்காக சிறப்பு தொழுகை நிகழ்ச்சிகள் நடத்தப்பட்டதாக கூறப்படுகிறது.அவரது வருகையைத் தொடர்ந்து, ஈரான் அரசின் ஆதரவுடன் அலிப்பூரில் காமேனி பெயரில் ஒரு மருத்துவமனை நிறுவப்பட்டது.
இன்றளவும் இயங்கி வரும் அந்த மருத்துவமனை மூலம் உள்ளூர் மக்கள் பலனடைந்து வருகின்றனர். இதன் பின்னர் அலிப்பூர் மக்களுக்கும் ஈரானுக்கும் இடையே நெருங்கிய தொடர்பு ஏற்பட்டதாகவும், தற்போது அங்கிருந்து 150 முதல் 200 பேர் வரை ஈரானில் பணியாற்றி வருகின்றனர் என்றும் கூறப்படுகிறது.
காமேனியின் மறைவைத் தொடர்ந்து, அலிப்பூரில் மக்கள் கருப்பு உடை அணிந்து ஊர்வலமாகச் சென்றனர். அந்த ஊர்வலத்தின் போது அமெரிக்கா மற்றும் இஸ்ரேல் அரசுகளுக்கு எதிராக முழக்கங்கள் எழுப்பப்பட்டன. மேலும், மூன்று நாட்கள் கடைகள் மற்றும் வணிக நிலையங்களை மூடி துக்கம் அனுசரிக்க தீர்மானித்ததாக வணிகர்கள் அறிவித்துள்ளனர். ஷியா முஸ்லிம்கள் வசிக்கும் வீடுகள் மற்றும் கடைகளில் கருப்பு கொடிகள் ஏற்றப்பட்டுள்ளன.
