மோடி முன்வைத்த ஊழல் குற்றச்சாட்டுகளுக்கு ஸ்டாலின் பதிலளிக்க வேண்டும்: தமிழக பாஜக கோரிக்கை.!
மதுரையில் 2026 மார்ச் 1ஆம் திகதி நடைபெற்ற தேசிய ஜனநாயகக் கூட்டணி தேர்தல் பிரச்சாரப் பொதுக்கூட்டத்தில், திமுக ஆட்சி மீது பிரதமர் மோடி பல துறைகளில் ஊழல் மற்றும் நிர்வாகச் சீர்கேடு குறித்த குற்றச்சாட்டுகளை முன்வைத்தார். இந்தக் குற்றச்சாட்டுகளுக்கு முதல்வர் மு.க. ஸ்டாலின் உடனடியாக பதிலளிக்க வேண்டும் என தமிழக பாஜக வலியுறுத்தியுள்ளது.
இதுகுறித்து தமிழக பாஜக வெளியிட்ட அறிக்கையில், பிரதமர் மோடி திமுக ஆட்சியில் பல துறைகளில் பெருமளவு ஊழல் நடைபெற்றதாக குறிப்பிட்டதாக தெரிவிக்கப்பட்டுள்ளது. மணல் கொள்ளை, டாஸ்மாக் மதுபான முறைகேடு, அரசுப் பணி நியமன ஊழல், அரசு ஒப்பந்த முறைகேடு, பணியிட மாற்ற ஊழல் உள்ளிட்ட பல்வேறு குற்றச்சாட்டுகளை அவர் முன்வைத்ததாகவும், மொத்தமாக சுமார் 48 ஆயிரம் கோடி ரூபாய் அளவுக்கு ஊழல் நடைபெற்றுள்ளதாக கூறியதாகவும் அறிக்கையில் குறிப்பிடப்பட்டுள்ளது.
மேலும், மத்திய உள்துறை அமைச்சர் அமித் ஷா திமுக அரசு 20 சதவீதம் ஊழல் செய்யும் அரசு என குற்றம் சாட்டியதை நினைவுகூர்ந்த தமிழக பாஜக, இதுவரை முதல்வர் ஸ்டாலின் குற்றச்சாட்டுகளுக்கு பதில் அளிக்காமல் மௌனம் சாதிப்பதாக விமர்சித்துள்ளது.
அதேபோல், பிரதமரின் வீட்டுவசதி திட்டத்தின் கீழ் சுமார் மூன்று இலட்சம் வீடுகள் கட்டும் திட்டத்தை திமுக அரசு தடுத்து நிறுத்தியதாகவும், உயர் நீதிமன்றத்தின் அறிவுறுத்தல்களைப் பின்பற்றாததற்கான காரணம் விளக்கப்பட வேண்டும் என்றும் அந்த அறிக்கையில் கேள்வி எழுப்பப்பட்டுள்ளது.முதல்வர் மு.க. ஸ்டாலின் மற்றும் துணை முதல்வர் உதயநிதி ஸ்டாலின் இருவரும் மக்கள் மன்றத்தில் உடனடியாக விளக்கம் அளிக்க வேண்டும் என தமிழக பாஜக தெரிவித்துள்ளது.
