திண்டுக்கல்லைச் சேர்ந்த செல்வகணேஷ் என்பவர், தனது 72 வயதுடைய தாயார் ஜெயலட்சுமி காணாமல் போயுள்ளதாகக் கூறி, உயர் நீதிமன்ற மதுரை அமர்வில் ஆட்கொணர்வு மனு தாக்கல் செய்திருந்தார். அந்த மனுவை நீதிபதிகள் ஜி.கே. இளந்திரையன் மற்றும் ஆர். பூர்ணிமா ஆகியோர் விசாரித்தனர்.
விசாரணையின் போது சமர்ப்பிக்கப்பட்ட தகவல்களின் அடிப்படையில், ஜெயலட்சுமி திருமணம் ஆகாதவர் என்றும், அதிகளவான சொத்துகள் கொண்டவர் என்றும் தெரியவந்தது. அவர் உதவிப் பேராசிரியராக பணியாற்றியவர் என்றும், மனுதாரர் செல்வகணேஷை தத்தெடுத்துள்ளார் என்றும் குறிப்பிடப்பட்டது.ஆனால், செல்வகணேஷ் தன்னை மிரட்டி சில சொத்துகளை அபகரித்ததாக ஜெயலட்சுமி தெரிவித்தார்.
இதனால் அச்சமடைந்து, அவர் முதியோர் இல்லத்தில் தஞ்சம் அடைந்ததாகவும் கூறினார். இதனையடுத்து, தன்னை காணவில்லை எனக் கூறி தாக்கல் செய்யப்பட்ட மனு விசாரணைக்கு எடுத்துக்கொள்ளப்பட்டது. பொலிஸார் ஜெயலட்சுமியை நீதிமன்றத்தில் ஆஜர்படுத்தியபோது, செல்வகணேஷின் நடத்தை காரணமாக தனது உயிருக்கும் உடைமைக்கும் ஆபத்து ஏற்பட்டதாகவும், அதனால் முதியோர் இல்லத்தில் பாதுகாப்பு தேடியதாகவும் அவர் தெரிவித்தார்.
மேலும், தன்னிடம் சட்டவிரோதமாகவும் கட்டாயப்படுத்தியும் கையெழுத்து பெறப்பட்ட ஆவணங்களை ரத்து செய்ய வேண்டும் எனவும் கோரினார்.இதனைத் தொடர்ந்து, ஆட்கொணர்வு மனுவை நீதிமன்றம் தள்ளுபடி செய்ததுடன், மனுதாரர் செல்வகணேஷுக்கு ரூ.1 லட்சம் அபராதம் விதித்தது. அந்தத் தொகையை ஒரு வாரத்திற்குள் உயர் நீதிமன்ற மதுரை அமர்வு சட்டப் பணிகள் ஆணைக்குழுவில் செலுத்த வேண்டும் என உத்தரவிடப்பட்டது.
மேலும், ஜெயலட்சுமியிடமிருந்து சட்டவிரோதமாக கையெழுத்து பெறப்பட்டதாகக் கூறப்படும் ஆவணங்கள் தொடர்பாக திண்டுக்கல் மாவட்டப் பதிவாளர் உரிய நடவடிக்கை எடுக்க வேண்டும் எனவும் நீதிமன்றம் உத்தரவிட்டுள்ளது. அதேபோல், ஜெயலட்சுமி அளித்த புகாரின் பேரில் திண்டுக்கல் காவல் துறை வழக்குப் பதிவு செய்து சட்ட நடவடிக்கை எடுக்க வேண்டும் என்றும், அவருக்கு பொலிஸார் பாதுகாப்பு வழங்க வேண்டும் என்றும் நீதிபதிகள் கூறினர்.இவ்வழக்கு தொடர்பாக திண்டுக்கல் மாவட்ட காவல் கண்காணிப்பாளர் அறிக்கை தாக்கல் செய்யவும் உத்தரவிடப்பட்டுள்ளது. மேலதிக விசாரணை ஜூன் 2ஆம் திகதிக்கு ஒத்திவைக்கப்பட்டுள்ளது.
