2026 சட்டமன்றத் தேர்தலை முன்னிட்டு அரசியல் கட்சிகள் வாக்குறுதிகளை அறிவித்து வரும் நிலையில், முன்னாள் முதலமைச்சர் ஜெயலலிதா அவர்களின் பிறந்த நாளை ஒட்டி, எடப்பாடி பழனிசாமி மூன்றாம் கட்ட தேர்தல் வாக்குறுதிகளை வெளியிட்டுள்ளார்.
ஸ்டாலின் தலைமையிலான திராவிட முன்னேற்றக் கழகம் ஆட்சியில் கடந்த ஐந்து ஆண்டுகளில் அத்தியாவசியப் பொருட்களின் விலைவாசி உயர்ந்ததுடன், சொத்து வரி, வீட்டு வரி, மின்சாரக் கட்டணம், குடிநீர் வரி உள்ளிட்ட பல்வேறு வரிகளும் அதிகரிக்கப்பட்டுள்ளதாக அவர் குற்றம்சாட்டினார்.
இதனால் மக்களின் அன்றாட வாழ்க்கைச் சுமை அதிகரித்துள்ளதாக தெரிவித்தார்.இதனைத் தணிக்கும் வகையில், ஒவ்வொரு குடும்பத்திற்கும் கருணைத் தொகையாக 10,000 ரூபாய் வழங்கப்படும் என அறிவிக்கப்பட்டுள்ளது. மீன்பிடித் தடைக்காலங்களில் மீனவர்களுக்கு வழங்கப்படும் நிவாரணத் தொகை 8,000 ரூபாயிலிருந்து 12,000 ரூபாயாக உயர்த்தப்படும் என்றும் கூறப்பட்டுள்ளது.
மேலும், ஒவ்வொரு ஆண்டும் தைப்பொங்கல் அன்று வழங்கப்படும் பொங்கல் தொகுப்புடன் கூடுதலாக 1,000 ரூபாய் வழங்கப்படும் எனவும் தெரிவிக்கப்பட்டுள்ளது.கைத்தறி நெசவாளர்களுக்கு வழங்கப்படும் இலவச மின்சாரம் 300 அலகுகளில் இருந்து 450 அலகுகளாகவும், விசைத்தறி நெசவாளர்களுக்கு 1,000 அலகுகளில் இருந்து 1,400 அலகுகளாகவும் உயர்த்தப்படும் என்றும் அறிவிக்கப்பட்டுள்ளது.நகரப் பகுதிகளில் நடைபாதை ஓரமாக வியாபாரம் செய்பவர்கள் கூட்டுறவு வங்கிகளில் பெற்ற கடன்கள் தள்ளுபடி செய்யப்படும் என்றும் அவர் தெரிவித்துள்ளார்.
