அமெரிக்கா மற்றும் ஈரான் இடையிலான இரண்டாம் சுற்று அணுசக்தி ஒப்பந்தப் பேச்சுவார்த்தை தற்போது ஜெனிவாவில் ஆரம்பமாகியுள்ளது.அமெரிக்கா, ஈரான் சர்வதேச விதிகளுக்கு அப்பாற்பட்டு அதிகளவு செறிவூட்டப்பட்ட யுரேனியத்தை வைத்திருக்கிறதென குற்றம்சாட்டி, புதிய கட்டுப்பாட்டு ஒப்பந்தத்தை வலியுறுத்தி வருகிறது.
முன்னதாக ஓமனில் நடைபெற்ற முதல் சுற்றுப் பேச்சுவார்த்தையில் எவ்வித சமரசமும் எட்டப்படாத நிலையில், ஜெனிவா பேச்சுவார்த்தை முக்கியத்துவம் பெற்றுள்ளது.அமெரிக்கா எச்சரிக்கை விடுத்தபோது, ஈரானின் உச்ச தலைவர் அயதுல்லா அலி கமேனி “உலகின் வலிமையான இராணுவம் கூட சில நேரங்களில் கடுமையான அடி வாங்கி மீண்டும் எழ முடியாமல் தவிக்கும்” எனக் கூறியுள்ளார்.
கடந்த ஆண்டு அமெரிக்கா மற்றும் இஸ்ரேல் ஈரானின் அணுசக்தி மையங்களுக்கு நடத்திய தாக்குதல்கள், ஹார்முஸ் நீரிணைப்பில் ஈரானின் இராணுவ பயிற்சி, பிராந்திய பதற்றத்தை அதிகரித்துள்ளன. அமெரிக்க படைகள் மேற்காசியப் பகுதியில் குவிக்கப்பட்டு, சர்வதேச சந்தையில் கச்சா எண்ணெய் விலை ஏற்ற இறக்கங்களை சந்தித்துள்ளது.இந்த ஜெனிவா பேச்சுவார்த்தை சுமுக முடிவை அடையுமா, அல்லது ஒரு பாரிய போருக்கு வழிவகுக்குமா என்பது உலக நாடுகளின் கவனத்திலும் அச்சத்திலும் உள்ளது.
