கர்நாடகா மாநிலம் பெங்களூரு ஜே.பி. நகரில் வசித்து வரும் தம்பதியரின் 3 வயது மகன் குளத்தில் மூழ்கி உயிரிழந்த சம்பவம் சோகத்தை ஏற்படுத்தியுள்ளது.சரண்ராஜ் – ஸ்வாதி தம்பதியரின் மகன் லக்ஸ்வீர் (3) என்பவன் உயிரிழந்ததாக தெரிவிக்கப்படுகிறது. ஸ்வாதி தற்போது இரண்டாவது குழந்தைக்கு 7 மாத கர்ப்பிணியாக உள்ளார்.
கடந்த சனிக்கிழமை, கிடெனஹள்ளி கிராமத்தில் உள்ள தி ஷயர் ஸ்டுடியோ எனும் படப்பிடிப்பு நிலையத்திற்கு கர்ப்ப கால புகைப்படம் எடுக்க ஸ்வாதி தனது மகனுடன் சென்றுள்ளார்.அவர் புகைப்படப்பிடிப்பில் ஈடுபட்டிருந்தபோது, ஸ்டூடியோ வளாகத்தில் உள்ள மூன்று குளங்களின் அருகே விளையாடிக் கொண்டிருந்த குழந்தை திடீரென காணாமல் போனது. பின்னர், ஸ்டூடியோ ஊழியர் ஒருவர் குழந்தை குளத்தில் மூழ்கியிருப்பதை கண்டறிந்தார்.
உடனடியாக மருத்துவமனைக்கு கொண்டு செல்லப்பட்டாலும், செல்லும் வழியிலேயே குழந்தை உயிரிழந்தது.குளத்தின் ஆழம் 2 அடி மட்டுமே இருந்ததாக கூறப்படுகின்றது. எனினும், குளத்தில் அதிக சேறு இருந்ததால் குழந்தை வெளியே வர முடியாமல் சிக்கியிருக்கலாம் என சந்தேகிக்கப்படுகிறது.பிரேதப் பரிசோதனைக்குப் பின்னர், குழந்தையின் உடல் குடும்பத்தினரிடம் ஒப்படைக்கப்பட்டுள்ளது.
