மணிப்பூர் மாநிலத்தில் குகி மற்றும் மெய்தி சமூகங்களுக்கிடையில் கடந்த இரண்டு ஆண்டுகளாக நீடித்து வரும் இன மோதல்கள் மீண்டும் தீவிரமடைந்துள்ளன. இதுவரை ஏற்பட்ட கலவரங்களில் 250க்கும் அதிகமானோர் உயிரிழந்துள்ளதாக தகவல்கள் தெரிவிக்கின்றன.
மாநிலத்தில் நிலவி வந்த அரசியல் குழப்பத்தால் பா.ஜ.க அரசு விலகியதையடுத்து ஜனாதிபதி ஆட்சி அமுல்படுத்தப்பட்டது. பின்னர் கடந்த 04ஆம் திகதி கெம்சந்த் சிங் தலைமையில் புதிய பா.ஜ.க அரசு பதவியேற்றது.இந்தநிலையில், உக்ருல் மாவட்டத்தின் லிட்டன் சரேய்கோங் கிராமத்துக்குள் புகுந்த குழுவொன்று தங்குல் சமூகத்தைச் சேர்ந்த நபரொருவரை தாக்கியதுடன், பல வீடுகளுக்கும் தீ வைத்துள்ளதாக தெரிவிக்கப்படுகிறது.
இதனைத் தொடர்ந்து நேற்று (10) அதிகாலை குறித்த பகுதியில் துப்பாக்கிச் சூடு இடம்பெற்றுள்ளது. பாதுகாப்பு படையினர் பெருமளவில் குவிக்கப்பட்டிருந்த போதிலும், இடைஇடையே துப்பாக்கிச் சூட்டு சம்பவங்கள் தொடர்ந்துவருவதாக தகவல்கள் வெளியாகியுள்ளன.
அமைதியை நிலைநிறுத்தும் முயற்சியாக, உக்ருல் மாவட்டத்தில் இணைய சேவைகள் 5 நாட்களுக்கு இடைநிறுத்தப்படுவதாக மாநில அரசு அறிவித்துள்ளது.மாநிலத்தில் மீண்டும் பதற்றமான சூழ்நிலை நிலவி வருவதால், பாதுகாப்பு நடவடிக்கைகள் பலப்படுத்தப்பட்டுள்ளன.
