ஹொரைசன் யூரோப் திட்டத்தில் இணைவது குறித்து ஐரோப்பிய ஒன்றியம் – இந்தியா பேச்சுவார்த்தை!

ஐரோப்பிய ஆணையமும் இந்திய அரசாங்கமும், ஐரோப்பிய ஒன்றியத்தின் முதன்மை ஆராய்ச்சி மற்றும் புதுமைத் திட்டமான ‘ஹொரைசன் யூரோப்’ (Horizon Europe) திட்டத்தில் இந்தியா இணைவதற்கான ஆரம்பகட்ட பேச்சுவார்த்தைகளை அதிகாரப்பூர்வமாகத் தொடங்கியுள்ளன.புது டெல்லியில் நடைபெற்ற 16வது ஐரோப்பிய ஒன்றியம்–இந்தியா உச்சிமாநாட்டைத் தொடர்ந்து இந்த அறிவிப்பு வெளியிடப்பட்டது. வர்த்தகம், பாதுகாப்பு, அறிவியல் மற்றும் புதுமைத் துறைகளில் ஒத்துழைப்பை வலுப்படுத்த இரு தரப்புத் தலைவர்களும் உறுதி தெரிவித்துள்ளனர்.இந்தப் பேச்சுவார்த்தைகள் வெற்றிகரமாக நிறைவடைந்தால், உலகின் மிகப்பெரிய ஆராய்ச்சி நிதித் திட்டமாகக் கருதப்படும் ‘ஹொரைசன் யூரோப்’ திட்டத்தை இந்தியா நேரடியாக அணுகும் வாய்ப்பு கிடைக்கும்.

இதன் மூலம் இந்தியப் பல்கலைக்கழகங்கள், ஆராய்ச்சி நிறுவனங்கள் மற்றும் தொழில்துறை அமைப்புகள், ஐரோப்பிய ஒன்றிய நாடுகளுக்கு இணையான அந்தஸ்துடன் நிதியுதவிக்கு விண்ணப்பிக்க முடியும்.மேலும், இந்தியா வழங்கும் நிதிப் பங்களிப்பிற்கு ஈடாக, சர்வதேச முன்னணி ஆராய்ச்சி திட்டங்களில் இந்திய நிறுவனங்கள் தலைமை வகிக்கவும் அல்லது பங்கேற்கவும் வழிவகை செய்யப்படும்.“எல்லைகள் கருத்துக்களுக்கு தடையாக இல்லாதபோது அறிவியல் சிறப்பாக முன்னேறும்” என்ற நோக்கில், திறமையும் நம்பிக்கையும் ஒன்றிணைந்து உலகளாவிய சவால்களுக்கு தீர்வுகளை உருவாக்குவதே இந்த இணைப்பின் பிரதான குறிக்கோளாகும்.
இந்த அறிவியல் ஒத்துழைப்பு, 2001ஆம் ஆண்டு கையெழுத்திடப்பட்ட ‘அறிவியல் மற்றும் தொழில்நுட்ப ஒத்துழைப்பு ஒப்பந்தத்தின்’ கீழ் முன்னெடுக்கப்படுகிறது.

இந்த ஒப்பந்தம் சமீபத்தில் 2030ஆம் ஆண்டு வரை புதுப்பிக்கப்பட்டுள்ளது.மேலும், ‘2030-ஐ நோக்கிய விரிவான மூலோபாயத் திட்டம்’ (2030 Comprehensive Strategic Agenda) ஆராய்ச்சி மற்றும் புதுமையை மையமாகக் கொண்டு செயல்படுகிறது. ஹொரைசன் யூரோப் தொடர்பான இந்தப் பேச்சுவார்த்தை, இரு நாடுகளின் ஆராய்ச்சி சூழலை ஒருங்கிணைக்கும் முக்கிய முன்னேற்றமாகக் கருதப்படுகிறது.
€93.5 பில்லியன் (93.5 பில்லியன் யூரோ) மதிப்புடைய ‘ஹொரைசன் யூரோப்’ உலகின் மிகப்பெரிய ஆராய்ச்சி நிதித் திட்டமாகும்.

இதில் ஐரோப்பிய ஒன்றியத்துக்கு வெளியேயுள்ள நாடுகள் இணைவது உயர்ந்த சர்வதேச அறிவியல் ஒத்துழைப்பாகப் பார்க்கப்படுகிறது.கனடா, இஸ்ரேல், தென் கொரியா, ஐக்கிய இராச்சியம் (UK), சுவிட்சர்லாந்து உள்ளிட்ட 22 நாடுகள் ஏற்கனவே இதில் இணைந்துள்ளன. ஜப்பானுடனான பேச்சுவார்த்தைகள் 2025 டிசம்பரில் நிறைவடைந்துள்ளன. ஆஸ்திரேலியாவுடன் பேச்சுவார்த்தைகள் தொடர்ந்து நடைபெற்று வருகின்றன. மொராக்கோவுடனான பேச்சுவார்த்தைகள் தற்காலிகமாக நிறுத்தப்பட்டுள்ளன.இந்தத் திட்டத்தில் இந்தியா இணைந்தால், உலகளாவிய ஆராய்ச்சி துறையில் அதன் பங்கு மேலும் வலுப்பெறும் என்றும், ஐரோப்பாவின் முக்கிய அறிவியல் பங்காளியாக இந்தியா உருவெடுக்க வாய்ப்பு அதிகரிக்கும் என்றும் எதிர்பார்க்கப்படுகிறது.