உயர் இரத்த அழுத்தத்திற்கு பயன்படுத்தப்படும் ஒரு மருந்து தொடர்பாக ஏற்பட்ட உற்பத்தி சிக்கலின் காரணமாக நாடு முழுவதும் அவசர திரும்பப்பெறல் அறிவிப்பு விடுக்கப்பட்டுள்ளது.கனடிய சுகாதார திணைக்களம் வெளியிட்ட தகவலின்படி, மார்-அம்லோடிபின் 5 மில்லிகிராம் மாத்திரைகளின் இரண்டு தொகுதிகள் திரும்பப்பெறப்பட்டுள்ளன. சில மருந்து பாட்டில்களில் தவறான மாத்திரைகள் நிரப்பப்பட்டிருக்கலாம் என தெரிவிக்கப்பட்டுள்ளது.
பொதுவாக, மார்-அம்லோடிபின் 5 மில்லிகிராம் மாத்திரைகள் உயர் இரத்த அழுத்தம் மற்றும் மார்பு வலி சிகிச்சைக்காக வழங்கப்படுகின்றன. எனினும், உற்பத்தியாளர் மார்கன் மருந்து உற்பத்தி நிறுவனத்தின் தவறினால், குறைந்த இரத்த அழுத்தத்திற்கு பயன்படுத்தப்படும் மிடோட்ரின் 2.5 மில்லிகிராம் மாத்திரைகள் சில பாட்டில்களில் தவறுதலாக நிரப்பப்பட்டிருக்கலாம் என தெரிவிக்கப்பட்டுள்ளது.
சரியான மார்-அம்லோடிபின் 5 மில்லிகிராம் மாத்திரைகள் எட்டு பக்க வடிவில் காணப்படும். அவை வெள்ளை அல்லது ஓரளவு வெண்மை நிறத்தில் இருந்து, “210” மற்றும் “5” என்ற எண்கள் அச்சிடப்பட்டிருக்கும்.தவறுதலாக நிரப்பப்பட்டிருக்கக்கூடிய மிடோட்ரின் 2.5 மில்லிகிராம் மாத்திரைகள் வட்ட வடிவில் காணப்படும். அவற்றில் “M2” என்ற குறியீடு பொறிக்கப்பட்டிருக்கும்.
உயர் இரத்த அழுத்தம் கொண்ட நோயாளிகள் தவறுதலாக மிடோட்ரின் மாத்திரைகளை எடுத்துக்கொண்டால், ஆபத்தான அளவில் இரத்த அழுத்தம் அதிகரித்தல், தலைச்சுற்றல், மயக்கம் மற்றும் உடல் உறுப்புகள் சேதமடையும் அபாயம் ஏற்படலாம் என கனடிய சுகாதார திணைக்களம் எச்சரித்துள்ளது.
