மறைந்த பாலியல் குற்றவாளி ஜெப்ரி எப்ஸ்டீன் தொடர்பான சர்ச்சைகள் பிரித்தானிய அரசியலில் அதிர்வுகளை ஏற்படுத்தி வரும் நிலையில், பிரதமர் கீர் ஸ்டார்மரின் நெருக்கமான அதிகாரிகள் தொடர்ச்சியாக பதவி விலகி வருவது அரசியல் பரபரப்பை அதிகரித்துள்ளது.
அதன்படி, பிரதமர் அலுவலகத்தின் செய்தித் தொடர்பு நிர்வாகப் பணிப்பாளராக இருந்த டிம் ஆலன் நேற்று தனது பதவியிலிருந்து விலகியுள்ளார். புதிய குழுவை உருவாக்குவதற்கான வழிவிடும் நோக்கில் தாம் விலகுவதாக அவர் தெரிவித்துள்ளார்.இதற்கு முன்னதாக, பிரதமரின் பிரதான பணிக்குழாம் தலைவராக இருந்த மோர்கன் மெக்ஸ்வீனோவும் நேற்று பதவி விலகியிருந்தார்.
தொழிலாளர் கட்சியின் தேர்தல் வெற்றியில் முக்கிய பங்காற்றிய அவர், எப்ஸ்டீன் விவகாரத்தில் சர்ச்சைக்கு உள்ளான பீட்டர் மண்டெல்சனை அமெரிக்காவுக்கான தூதுவராக நியமிக்க பரிந்துரைத்ததற்குப் பொறுப்பேற்று விலகியதாக தெரிவிக்கப்படுகிறது.
பிரித்தானியாவின் முன்னாள் அமெரிக்கத் தூதுவரான பீட்டர் மண்டெல்சன், ஜெப்ரி எப்ஸ்டீனுடன் நெருங்கிய தொடர்பு வைத்திருந்ததாக அண்மையில் வெளியான ஆவணங்கள் மூலம் வெளிச்சத்துக்கு வந்துள்ளது.
குறிப்பாக, 2008 ஆம் ஆண்டு நிதி நெருக்கடியின் போது வணிக அமைச்சராக இருந்த அவர், ரகசிய அரசாங்கத் தகவல்களை எப்ஸ்டீனுடன் பகிர்ந்ததாக குற்றச்சாட்டுகள் முன்வைக்கப்பட்டுள்ளன.இந்தச் சர்ச்சையையடுத்து, கடந்த செப்டம்பர் மாதம் மண்டெல்சன் தூதுவர் பதவியிலிருந்து நீக்கப்பட்டார். தவறான நபரை முக்கிய இராஜதந்திர பதவிக்குத் தேர்வு செய்தமைக்காக பிரதமர் கீர் ஸ்டார்மர் ஏற்கனவே மன்னிப்பு கோரியிருந்தார்.
இந்நிலையில், அவரது தலைமைத் திறன் குறித்து எதிர்க்கட்சிகள் கடுமையான விமர்சனங்களை முன்வைத்து வருகின்றன. தொடர்ச்சியான ஆலோசகர் விலகல்கள், ஸ்டார்மரின் 18 மாத ஆட்சிக்காலத்தில் உருவான மிகப் பெரிய அரசியல் நெருக்கடியாக அரசியல் வட்டாரங்களில் மதிப்பிடப்படுகிறது.
