ஜப்பானின் பிரதமராக சனே தகைச்சி கடந்த ஒக்டோபர் மாதம் பதவி ஏற்றார். பதவி ஏற்றதும் அவருக்கு மக்களிடையே 70 சதவீதத்துக்கும் அதிகமான ஆதரவு நிலவுவதாக தெரிவிக்கப்பட்டுள்ளது.நாடாளுமன்றத்தில் அவரது கூட்டணிக்கு குறைந்த அளவிலான பெரும்பான்மை மட்டுமே இருந்த நிலையில், தனது பொருளாதார மற்றும் பாதுகாப்புக் கொள்கைகளை தடையின்றி செயல்படுத்தவும், அரசியல் செல்வாக்கை வலுப்படுத்தவும் பொதுத் தேர்தலை நடத்தும் முடிவை அவர் எடுத்தார்.
வரவு–செலவுத் திட்டம் தாக்கல் செய்ய வேண்டிய காலப்பகுதியில் தேர்தல் அறிவிப்பது நாட்டின் நிர்வாகத்திற்கு பாதிப்பு ஏற்படுத்தும் என எதிர்க்கட்சிகள் குற்றஞ்சாட்டின. இதற்கு பதிலளித்த பிரதமர், புதிய அரசு அமைந்ததும் உடனடியாக வரவு–செலவுத் திட்டம் நிறைவேற்றப்படும் என உறுதியளித்தார்.
இதனைத் தொடர்ந்து ஜப்பானிய நாடாளுமன்றம் கலைக்கப்பட்டதுடன், அதற்கான உத்தரவை பிரதமர் பிறப்பித்தார். அதன் பின்னர் நடைபெற்ற பொதுத் தேர்தலில் ஆளும் சுதந்திர ஜனநாயகக் கட்சி 465 இடங்களில் 352 இடங்களை கைப்பற்றி தெளிவான பெரும்பான்மையைப் பெற்றுள்ளது.இந்த வெற்றியின் மூலம் மக்களால் தேர்ந்தெடுக்கப்பட்ட ஜப்பானின் முதல் பெண் பிரதமர் என்ற பெருமையை சனே தகைச்சி பெற்றுள்ளார். அவருக்கு பல்வேறு தரப்பினரும் வாழ்த்துகளைத் தெரிவித்து வருகின்றனர்.
