இந்தியா–அமெரிக்கா இடையே இடைக்கால வர்த்தக ஒப்பந்தம் ஏற்றுக்கொள்ளப்பட்டதைத் தொடர்ந்து, அதனை விளக்கும் கூட்டறிக்கையை அமெரிக்காவின் வெள்ளை மாளிகை வெளியிட்டுள்ளது. அதனுடன் இணைக்கப்பட்டிருந்த விளக்கப்படத்தில் இடம்பெற்ற இந்தியாவின் வரைபடம் சர்வதேச அளவில் கவனத்தை ஈர்த்துள்ளது.
குறித்த வரைபடத்தில், சீனாவின் கட்டுப்பாட்டில் உள்ள அக்சய் சின் பகுதியும், பாகிஸ்தானின் ஆளுகைக்குட்பட்ட காஷ்மீரும் இந்தியாவின் பகுதிகளாகக் காட்டப்பட்டுள்ளன. குறிப்பாக, ஜம்மு–காஷ்மீர் முழுப் பகுதிகளும் இந்திய நிலப்பரப்பாக சித்தரிக்கப்பட்டுள்ளதாக இந்திய ஊடகங்கள் செய்தி வெளியிட்டுள்ளன.இந்த விளக்கப்படம், இந்தியா வரிக்குறைப்பு செய்ய உள்ள பொருட்களின் பட்டியலுடன் சேர்த்து வெளியிடப்பட்டுள்ளது. இருப்பினும், அதில் இடம்பெற்றுள்ள வரைபடம் அரசியல் முக்கியத்துவம் வாய்ந்ததாக கருதப்படுகிறது.
ஜம்மு–காஷ்மீர் விவகாரம் தொடர்பில், பாகிஸ்தான் பிரதமர் ஷபாஸ் ஷெரீப் மற்றும் இராணுவ தளபதி ஆசிம் முனீர் உள்ளிட்டோர் அமெரிக்காவின் ஆதரவைப் பெற பலமுறை வொஷிங்டனுக்கு பயணம் மேற்கொண்டிருந்தனர். மேலும், காஷ்மீர் பிரச்சினையை சர்வதேச அரங்கில் முன்வைக்க பாகிஸ்தான் தொடர்ந்து முயற்சிகளை மேற்கொண்டு வருகிறது.இந்நிலையிலேயே, அமெரிக்கா வெளியிட்டுள்ள இந்த புதிய வரைபடம், இந்தியாவின் நிலைப்பாட்டை ஒத்துக் கொள்ளும் வகையில் அமைந்துள்ளதாக அரசியல் ஆய்வாளர்கள் கருத்து தெரிவிக்கின்றனர். இது சீனா மற்றும் பாகிஸ்தானுக்கு அமெரிக்கா வழங்கும் அரசியல் சமிக்ஞையாக இருக்கக்கூடும் எனவும் அவர்கள் சுட்டிக்காட்டுகின்றனர்.
