அமெரிக்காவில் ஏற்பட்டுள்ள கடும் பனிப்புயல் காரணமாக விமானப் போக்குவரத்து கடுமையாக பாதிக்கப்பட்டுள்ளது. நேற்று (24) மட்டும் 3,400 விமானங்கள் இரத்து செய்யப்பட்டதாகவும், இன்று (25) 5,000 க்கும் மேற்பட்ட விமானங்கள் இரத்து செய்யப்பட்டுள்ளதாகவும் அந்நாட்டு விமானப் போக்குவரத்து சபை தெரிவித்துள்ளது.
உலகின் மிகப்பெரிய நாடுகளில் ஒன்றான அமெரிக்காவில், ஈஸ்ட் டெக்சாஸிலிருந்து நார்த் கரோலினா வரை பனிப்புயல் வீசக்கூடும் என வானிலை ஆய்வு மையம் எச்சரிக்கை விடுத்துள்ளது.பனிப்புயல் காரணமாக பெரும் பாதிப்புகள் ஏற்படக்கூடும் என்பதால், நியூ மெக்சிகோ முதல் நியூ இங்கிலாந்து வரை உள்ள பகுதிகளில் வசிக்கும் சுமார் 14 கோடி மக்களுக்கு பாதுகாப்பு அறிவுறுத்தல்கள் வழங்கப்பட்டுள்ளன.
டெக்சாஸ், ஓக்லஹோமா, கன்சாஸ் ஆகிய மாநிலங்களில் நேற்று பனிப்பொழிவு அதிகரித்து காணப்பட்டது. அதேபோல், டகோடாஸ் மற்றும் மின்னெசோடா மாநிலங்களில் குளிர்காற்றின் வெப்பநிலை மைனஸ் 45 டிகிரி செல்சியஸ்க்கும் கீழ் வீழ்ந்ததால் மக்கள் கடும் சிரமங்களை எதிர்கொண்டுள்ளனர்.லூயிசியானா, மிசிசிப்பி, டென்னிசி ஆகிய மாநிலங்களில் பனிப்பொழிவின் தாக்கம் அதிகரித்துள்ள நிலையில், மரங்கள், மின்சார கம்பிகள், கோபுரங்கள் மற்றும் வீதிகளில் சுமார் ஒரு அங்குலம் தடிப்பில் பனி படர்ந்துள்ளதாக அதிகாரிகள் தெரிவித்துள்ளனர்.
இந்த நிலைமையை தொடர்ந்து பல பகுதிகளில் அவசரநிலை பிரகடனப்படுத்தப்பட்டுள்ளது. பொதுமக்கள் அவசியமின்றி வீடுகளை விட்டு வெளியேற வேண்டாம் என அதிகாரிகள் அறிவுறுத்தியுள்ளனர்.
