சீனப் பொருளாதாரம் நீண்டகால மந்தநிலை மற்றும் கட்டமைப்பு ரீதியான சவால்களை எதிர்கொண்டு வரும் நிலையில், நாடு முழுவதும் கிராமப்புறங்களில் போராட்டங்கள் அதிகரித்துளதாக அறிவிக்கப்படுகிறது. இது சமூக ரீதியான பதற்றங்களின் குறிப்பிடத்தக்க உயர்வைக் காட்டுகிறது.
பொருளாதாரக் கஷ்டங்கள், காணித் தகராறுகள் மற்றும் சமூக குறைகளால் தூண்டப்படும் இந்தப் போராட்டங்கள், உள்ளூர் மக்களுக்கும் அதிகாரிகளுக்கும் இடையிலான விரிசலை வெளிப்படுத்துகின்றன. குறிப்பாக பொருளாதார வாய்ப்புகள் குறைவாக உள்ள இடங்களிலும், அரசின் கொள்கைகள் பாரம்பரியத்துடன் மோதும் இடங்களிலும் இத்தகைய பதற்றங்கள் அதிகம் காணப்படுகின்றன.சீனாவின் உட்புறக் கிராமங்களில் வளர்ந்து வரும் ஸ்திரமற்ற தன்மையைச் சுட்டிக்காட்டும் வகையில், 2025 ஆம் ஆண்டில் கிராமப்புறப் போராட்டங்களின் எண்ணிக்கை பெருமளவு அதிகரித்துள்ளதாக சுயாதீன கண்காணிப்பு அமைப்புகளின் தரவுகள் தெரிவிக்கின்றன.
சீனாவின் சிவில் அமைதியின்மையைக் கண்காணிக்கும் ‘ஃப்ரீடம் ஹவுஸ்’ (Freedom House) அமைப்பின் ஒரு திட்டமான ‘சீனா டிசென்ட் மானிட்டர்’ (China Dissent Monitor – CDM) வழங்கிய தகவலின்படி, 2025 ஆம் ஆண்டின் முதல் பதினொரு மாதங்களில் சுமார் 661 கிராமப்புறப் போராட்டங்கள் பதிவாகியுள்ளன. இது 2024 ஆம் ஆண்டின் மொத்த எண்ணிக்கையை விட சுமார் 70 சதவீதம் அதிகமாகும்.இந்தச் சம்பவங்கள் நாடு தழுவிய அதிருப்தியின் ஒரு பகுதியாகும். 2025 ஆம் ஆண்டின் மூன்றாவது காலாண்டில் மட்டும் 1,392 போராட்ட நிகழ்வுகளை CDM பதிவு செய்துள்ளது. இது கடந்த ஆண்டுடன் ஒப்பிடுகையில் 45 சதவீத வளர்ச்சியாகும்.
சீனாவின் ஒட்டுமொத்த பொருளாதார மந்தநிலையே இந்தப் போராட்டங்களின் அதிகரிப்புக்குக் காரணமாக அமைகிறது. நகரங்களில் வேலைவாய்ப்புகள் குறைந்ததால், சொந்தக் கிராமங்களுக்குத் திரும்பிய பல புலம் பெயர் தொழிலாளர்கள் அங்கும் போதிய வருமானமின்றித் தவிக்கின்றனர்.நகரங்களைப் போலன்றி, விவசாயம் அல்லது முறைசாரா வேலைகளையே நம்பியுள்ள கிராமப்புற மக்கள், பொருளாதாரச் சரிவின் போது மிக மோசமாகப் பாதிக்கப்படுகின்றனர். நிலையான வருமானம் இல்லாதது போராட்டங்களைத் தூண்டும் முக்கிய காரணியாக மாறியுள்ளது.
2025 ஆம் ஆண்டில் நிலவிய கிராமப்புறப் போராட்டங்களுக்கு, உள்ளூர் அரசாங்கத்தின் நடவடிக்கைகள் பாரம்பரிய நடைமுறைகள் அல்லது சொத்து உரிமைகளில் தலையிடுவதாகக் கருதப்பட்டதே முக்கியக் காரணமாக அமைந்தது.ஹைனான் மற்றும் குவாங்சி: தனியார் கோயில் மற்றும் குலதெய்வ மண்டபங்கள் இடிக்கப்பட்டமை கிராம மக்களுக்கும் அதிகாரிகளுக்கும் இடையே வன்முறை மோதல்களை ஏற்படுத்தியது.
குய்சோ (Xifeng): பாரம்பரிய அடக்க முறைகளுக்கு மாறாக, உடல்களைத் தகனம் செய்ய வேண்டும் என்ற புதிய கட்டாய உத்தரவுக்கு எதிராகப் போராட்டங்கள் வெடித்தன.
அரசின் ‘நவீனமயமாக்கல்’ நடவடிக்கைகள் மக்களின் கலாச்சார விழுமியங்களுடன் மோதும் போது, அது தீவிரமான எதிர்ப்பாக உருவெடுக்கிறது.தீவிரம் அடையும் நீண்டகாலக் குறைகள்
நிலம் கையகப்படுத்துதல், வலுக்கட்டாயமாக வெளியேற்றுதல் மற்றும் ஊழல் போன்ற நீண்டகாலப் பிரச்சனைகள் தற்போதைய பொருளாதார நெருக்கடியால் மேலும் தீவிரமடைந்துள்ளன. ஏற்கனவே வருமானம் இழந்து நில உரிமைகளையும் இழந்த தொழிலாளர்கள், சமூக ரீதியாக ஏமாற்றமடைந்துள்ளனர்.
தொழில்துறை வளர்ச்சிக்காகக் கிராமப்புற நிலங்கள் கையகப்படுத்தப்படுவது, வாழ்வாதாரத்தை இழந்து நிற்கும் மக்களிடையே பெரும் அதிருப்தியை ஏற்படுத்தியுள்ளது.இந்தப் போராட்டங்களைக் கட்டுப்படுத்த சீன அரசு ஒடுக்குமுறை, கண்காணிப்பு மற்றும் ஊடகக் கட்டுப்பாடுகளைப் பயன்படுத்தி வருகிறது. ‘கிரிட்-ஸ்டைல்’ (Grid-style) சமூக மேலாண்மை முறையின் மூலம், போராட்டங்கள் பெரிதாக உருவெடுப்பதற்கு முன்பே அவற்றைக் கண்டறிந்து கட்டுப்படுத்த அரசு முயற்சிக்கிறது.
இருந்தபோதிலும், பதிவு செய்யப்பட்ட போராட்டங்களின் எண்ணிக்கை அதிகரித்து வருவது, உள்ளூர் மக்களின் குறைகள் தகவல் தடைகளைத் தாண்டி வெளி உலகிற்குத் தெரிய வருவதைக் காட்டுகிறது.2025 ஆம் ஆண்டின் கிராமப்புறப் போராட்டங்கள், பொருளாதார மந்தநிலையும் நீண்டகாலக் கட்டமைப்புச் சவால்களும் இணைந்து சமூகப் பதற்றத்தை எவ்வாறு உருவாக்குகின்றன என்பதைத் தெளிவுபடுத்துகின்றன. அடக்குமுறைகள் மற்றும் கண்காணிப்புகளுக்கு மத்தியிலும், மக்கள் தங்கள் உரிமைகளுக்காகவும் வாழ்வாதாரத்திற்காகவும் வீதியில் இறங்கிப் போராடுவது சீனாவில் ஒரு தொடர்ச்சியான நிகழ்வாக மாறியுள்ளது
