அனைவரையும் உள்ளடக்கி, பங்கேற்புடன் கூடிய அமைதி மற்றும் வௌிப்படைத்தன்மை மிக்கதாக பங்களாதேச தேர்தல் அமைய வேண்டும் என்று ஐரோப்பிய ஒன்றியம் வலியுறுத்தியுள்ளது.
ஐரோப்பிய ஒன்றியத் தேர்தல் கண்காணிப்பு அமைப்பின் பங்களாதேசத்திற்கான பிரதம பார்வையாளரான இவர்ஸ் இஜாப்ஸ் டாக்காவில் நடத்திய செய்தியாளர் மாநாட்டில் மேற்கண்டவாறு குறிப்பிட்டுள்ளார்.
2024 ஆம் ஆண்டு ஆகஸ்ட் மாதத்தின் முற்பகுதியில் இடம்பெற்ற வெகுஜன எழுச்சியைத் தொடர்ந்து, முன்னாள் பிரதமர் ஷேக் ஹசீனா தலைமையிலான அரசாங்கம் பதவி நீக்கப்பட்டதோடு ஹசீனாவும் நாட்டை விட்டு வெளியேறி இந்தியாவில் தங்கியுள்ளார்.
இந்நிலையில் நோபல் பரிசு பெற்ற முகமது யூனுஸ் தலைமையில் இடைக்கால அரசாங்கம் ஆட்சிப் பொறுப்பை ஏற்றது. அந்த அரசாங்கத்தின் அறிவிப்புக்கு அமைய பெப்ரவரி மாதம் 12 ஆம் திகதி பங்களாதேச பொதுத்தேர்தல் நடைபெறவுள்ளது.
இந்நிலையில் மேற்கண்டவாறு குறிப்பிட்டுள்ள ஜரோப்பிய ஒன்றியத் தேர்தல் கண்காணிப்பு அமைப்பின் பங்களாதேசத்திற்கான பிரதம பார்வையாளர், பங்களாதேசத்தின் எதிர்வரும் தேசியத் தேர்தல் வெளிப்படையானதாகவும் பங்கேற்புத் தன்மையுடையதாகவும் இருக்க வேண்டுமென ஐரோப்பிய ஒன்றியம் எதிர்பார்த்துள்ளது.
வாக்களிப்பை அமைதியாக நடத்த வேண்டும். ஜனநாயக செயல்பாட்டில் வாக்காளர்களின் நம்பிக்கையைத் தக்கவைக்க இது உதவும். ஜனநாயகப் பயணத்தில் தேர்தல் ஒரு முக்கியமான மைல்கல்லாகும்.
