இந்திய திரையுலகில் பிரபலமான நடிகைகளில் ஒருவரான ரகுல் ப்ரீத் சிங்குடன் தொடர்புடைய இடங்கள் உள்ளிட்ட மும்பையில் உள்ள 12 இடங்களில் வருமான வரித்துறையினர் சோதனை நடத்தியதாக தகவல்கள் வெளியாகியுள்ளன.
ரகுல் ப்ரீத் சிங் தமிழில் ‘அயலான்’, ‘இந்தியன் 2’, ‘என்.ஜி.கே’, ‘தீரன் அதிகாரம் ஒன்று’ உள்ளிட்ட திரைப்படங்களில் நடித்துள்ளார்.
இந்த நிலையில், ரகுல் ப்ரீத் சிங், அவரது மாமனார் வாசு பக்னானி மற்றும் அவர்களுடன் தொடர்புடையதாகக் கூறப்படும் பேனோரமா கலையகம் உள்ளிட்ட இடங்களில் இந்தச் சோதனைகள் முன்னெடுக்கப்பட்டதாகத் தகவல்கள் தெரிவிக்கின்றன.
திரைப்பட முதலீடுகள் மற்றும் வெளிநாடுகளில் இருந்து பெறப்பட்டதாகக் கூறப்படும் நிதி தொடர்பான விவகாரங்கள் குறித்து விசாரணை நடத்தும் நோக்கில் இந்தச் சோதனைகள் முன்னெடுக்கப்பட்டதாக இந்திய ஊடகங்கள் தெரிவிக்கின்றன.
மேலும், கடந்த காலங்களில் தெலுங்கு திரையுலகில் இடம்பெற்ற போதைப்பொருள் தொடர்பான விசாரணையின்போதும் ரகுல் ப்ரீத் சிங்கிடம் வருமான வரித்துறை அதிகாரிகள் வாக்குமூலம் பெற்றதாகத் தெரிவிக்கப்படுகிறது.
அதேவேளை, கடந்த ஆண்டு ரகுல் ப்ரீத் சிங்கின் சகோதரர் அமன் தொடர்பாக மும்பை போதைப்பொருள் தடுப்புப் பிரிவு காவல்துறையினரால் வழக்கு ஒன்று பதிவு செய்யப்பட்டிருந்ததாகவும் கூறப்படுகிறது.
இதனிடையே, தற்போதைய வருமான வரித்துறை சோதனைக்கும் போதைப்பொருள் தொடர்பான விவகாரங்களுக்கும் தொடர்பு உள்ளதா என்பது குறித்து அதிகாரப்பூர்வ தகவல்கள் வெளியாகவில்லை எனத் தெரிவிக்கப்படுகிறது.
