ஷங்கர் இயக்கத்தில் ரஜினிகாந்த், ஐஸ்வர்யா ராய் நடிப்பில் வெளியான ‘எந்திரன்’ திரைப்படத்துக்காக ஏ.ஆர். ரஹ்மான், உலகப் புகழ்பெற்ற பொப் பாடகர் மைக்கேல் ஜாக்சனுடன் இணைந்து பணியாற்றத் திட்டமிட்டிருந்ததாக இசையமைப்பாளர் தமன் தெரிவித்துள்ளார்.
‘Honest Townhall’ நிகழ்ச்சியில் பேசிய தமன், ‘எந்திரன்’ திரைப்படத்துக்காக மைக்கேல் ஜாக்சனுடன் இணைந்து ஒரு பாடலை உருவாக்கும் திட்டம் இருந்ததாகவும், அதற்கான ஒப்பந்தப் பணிகள் 2009ஆம் ஆண்டு மே மாதத்தில் நிறைவடைந்ததாகவும் தெரிவித்துள்ளார்.
எனினும், 2009ஆம் ஆண்டு ஜூன் மாதம் மைக்கேல் ஜாக்சன் உயிரிழந்ததைத் தொடர்ந்து, இந்த இசைக் கூட்டணி நிறைவேறாமல் போனதாக தமன் குறிப்பிட்டுள்ளார்.
முன்னதாக, 2009ஆம் ஆண்டு ஆஸ்கர் விருது பெற்ற பின்னர் லொஸ் ஏஞ்சல்ஸில் மைக்கேல் ஜாக்சனை சந்தித்ததாக ஏ.ஆர். ரஹ்மான் கூறியிருந்தார்.
அப்போது, இருவரும் இசை மற்றும் உலக அமைதி குறித்து கலந்துரையாடியதாகவும் ரஹ்மான் தெரிவித்திருந்தார்.
மேலும், ‘We Are The World’ பாடலைப் போன்ற மற்றொரு பாடலை இணைந்து உருவாக்குவது குறித்து மைக்கேல் ஜாக்சன் தன்னிடம் பேசியதாகவும், பின்னர் இந்த சந்திப்பு குறித்து இயக்குநர் ஷங்கரிடம் தெரிவித்ததாகவும் ரஹ்மான் முன்னதாக கூறியிருந்தார்.
மைக்கேல் ஜாக்சனின் மறைவால் இந்த முயற்சி நிறைவேறாமல் போன நிலையில், பல ஆண்டுகளுக்குப் பின்னர் இந்தத் தகவலை இசையமைப்பாளர் தமன் தற்போது பகிர்ந்துள்ளார்.
