மெட்ரோ போஸ்டர் வழக்குடன் தொடர்புடையதாகக் கூறப்படும், லஷ்கர்-இ-தொய்பா அமைப்பின் ஒருங்கிணைப்பாளரும் பயங்கரவாத சந்தேகநபருமான ஷபீர் அகமட் லோன் நேற்று (30) டெல்லி பொலிஸாரின் சிறப்புப் பிரிவினரால் கைது செய்யப்பட்டுள்ளார்.
அவர் குறித்த அமைப்புடன் இரகசியமாகச் செயல்பட்டு வந்த உறுப்பினராக அதிகாரிகள் தெரிவித்துள்ளனர்.
இதற்கு முன்னர் கொல்கத்தா மற்றும் தமிழ்நாடு உள்ளிட்ட பகுதிகளில் மேற்கொள்ளப்பட்ட ஒருங்கிணைந்த நடவடிக்கைகளில், பங்களாதேஷைச் சேர்ந்த ஏழு நபர்களும், மேற்கு வங்கத்தைச் சேர்ந்த ஒரு இந்தியரும் உட்பட எட்டு பேர் கைது செய்யப்பட்டிருந்தனர்.
பத்தாண்டு சிறைத்தண்டனை அனுபவித்த பின்னர் 2019ஆம் ஆண்டு பிணையில் விடுவிக்கப்பட்ட இவர், பின்னர் பங்களாதேஷுக்கு தப்பிச் சென்றிருந்தார் என விசாரணைகளில்தெரியவந்துள்ளது.மேலும், 2008 மும்பை தாக்குதலுடன் தொடர்புடையதாகக் கருதப்படும் ஹபீஸ் சயீத் மற்றும் ஜகி-உர்-ரஹ்மான் லக்வி ஆகியோருடன் நேரடி தொடர்பு இருந்ததாகவும் கூறப்படுகிறது.
கைது செய்யப்பட்டவர்களுடன் தொடர்புடையவர்கள் மதஸ்தலங்கள் அல்லது அதிக மக்கள் கூடும் பகுதிகளை குறிவைத்து தாக்குதல் நடத்தத் திட்டமிட்டிருந்தார்களா என்பது குறித்து டெல்லி பொலிஸார் மேலதிக விசாரணைகளை தீவிரப்படுத்தியுள்ளனர்.
