மேற்கு ஆசியப் போரின் தாக்கங்களுக்கு மக்கள் தயாராக இருக்க வேண்டும் என இந்தியப் பிரதமர் நரேந்திர மோடி மக்களவையில் தெரிவித்ததையடுத்து, தமிழக முதல்வர் மு.க. ஸ்டாலின் அதற்கு கடுமையான விமர்சனத்தை வெளியிட்டுள்ளார்.
மத்திய கிழக்கு மோதலின் தாக்கம் குறித்து பலமுறை எச்சரிக்கப்பட்டிருந்த போதிலும், மத்திய அரசு உரிய முன்னெச்சரிக்கை நடவடிக்கைகளை எடுக்கத் தவறிவிட்டு, தற்போது அதன் பொறுப்பை பொதுமக்கள் மீது சுமத்த முயல்கிறது என அவர் குற்றம் சாட்டினார்.
இது தொடர்பாக சமூக வலைத்தளத்தில் வெளியிட்ட பதிவில், தடையற்ற சமையல் எரிவாயு சிலிண்டர் விநியோகம், வளைகுடா நாடுகளில் சிக்கியுள்ள தமிழர்களுக்கான மீட்பு நடவடிக்கைகள் மற்றும் மின் நிலையங்களுக்கான எரிவாயு ஒதுக்கீட்டினை மறுபரிசீலனை செய்தல் உள்ளிட்ட அவசர நடவடிக்கைகளை வலியுறுத்தி மார்ச் 11ஆம் திகதி மத்திய அரசுக்கு கடிதம் அனுப்பியதாகவும் ஸ்டாலின் குறிப்பிட்டுள்ளார்.
அத்துடன், மத்திய அரசிடமிருந்து பதில் எதுவும் கிடைக்காத நிலையில், மார்ச் 14ஆம் தேதி தமிழக அரசு உயர்மட்டக் கூட்டம் ஒன்றை நடத்தி தன்னிச்சையான நிவாரண நடவடிக்கைகளை அறிவித்ததாகவும் அவர் தெரிவித்துள்ளார்.
மேலும், மார்ச் 15ஆம் தேதி மத்திய அரசின் தயார்நிலை இன்மையை கண்டித்து தமிழகம் முழுவதும் போராட்டங்கள் முன்னெடுக்கப்பட்டதாகவும் அவர் நினைவூட்டியுள்ளார்.அமெரிக்கா, இஸ்ரேல் மற்றும் ஈரான் இடையிலான தொடர்ச்சியான மோதல் தொடர்பாக பிரதமர் மோடி மக்களவையில் ஆற்றிய உரைக்கு பின்னரே தமிழக முதல்வரின் இந்தக் கருத்துக்கள் வெளியாகியுள்ளன.
