மேற்கு வங்கத்தில் அடுத்த மாதம் 23 மற்றும் 29 ஆம் திகதிகளில் இரண்டு கட்டங்களாக தேர்தல் நடைபெறவுள்ள நிலையில், திரிணமூல் காங்கிரஸ் கட்சியின் தேர்தல் அறிக்கையை முதல்வர் மம்தா பானர்ஜி வெளியிட்டார்.இதன்போது உரையாற்றிய அவர், கடந்த 15 ஆண்டுகளில் திரிணமூல் ஆட்சி காலத்தில் மேற்கு வங்கம் அனைத்து துறைகளிலும் குறிப்பிடத்தக்க முன்னேற்றம் கண்டுள்ளதாக தெரிவித்தார்.
மாநிலத்தின் பொருளாதாரம் ஆறு மடங்கு வளர்ச்சி அடைந்ததுடன், ஒருவரின் சராசரி வருமானம் மூன்று மடங்கு உயர்ந்துள்ளதாகவும் கூறினார்.மேலும், 1.72 கோடி மக்கள் ஏழ்மையிலிருந்து மீட்கப்பட்டுள்ளதாகவும், மூலதனச் செலவு 18 மடங்காகவும், கட்டமைப்பு முதலீடுகள் 7 மடங்காகவும் உயர்ந்துள்ளதாகவும் அவர் குறிப்பிட்டார்.
வேலைவாய்ப்பின்மை கடந்த ஆறு ஆண்டுகளில் 45.65 சதவீதம் குறைந்துள்ளதாகவும் தெரிவித்தார்.அடுத்த 10 ஆண்டுகளில் மேற்கு வங்கத்தை இந்தியாவின் மூன்றாவது பெரிய பொருளாதார மாநிலமாக மாற்றுவதே இலக்கு எனவும், கடந்த இரண்டு நிதியாண்டுகளில் இரட்டை இலக்க வளர்ச்சி எட்டப்பட்டுள்ளதாகவும் அவர் கூறினார்.
அடுத்த ஐந்து ஆண்டுகளில் மாநில பொருளாதாரம் 40 லட்சம் கோடி ரூபாவாக உயரும் என்றும், நவீன கட்டமைப்புகள், நீர்வழிப் போக்குவரத்து மற்றும் புதிய போக்குவரத்து மையங்கள் உருவாக்கப்பட்டு மேற்கு வங்கம் கிழக்கு இந்தியாவின் முக்கிய நுழைவாயிலாக மாறும் என்றும் மம்தா பானர்ஜி தெரிவித்தார்.
