இந்தியாவிற்கு எதிராக பயங்கரவாதச் செயல்களை மேற்கொள்ள சதித்திட்டம் தீட்டிய குற்றச்சாட்டில், ஆறு உக்ரேனியர்கள் மற்றும் அமெரிக்காவைச் சேர்ந்த ஒருவரை தேசிய புலனாய்வு முகமை அதிகாரிகள் கைது செய்துள்ளனர்.கடந்த வாரம் ஒருங்கிணைந்த நடவடிக்கையின் கீழ் மேற்கொள்ளப்பட்ட இந்த கைது, சட்டவிரோத நடவடிக்கைகள் தடுப்பு சட்டத்தின் கீழ் முன்னெடுக்கப்பட்டுள்ளது.
அமெரிக்க நபர் கொல்கத்தா விமான நிலையத்தில் தடுத்து வைக்கப்பட்டதுடன், உக்ரேனியர்கள் டெல்லி மற்றும் லக்னோ விமான நிலையங்களில் பிடிபட்டனர்.சந்தேகநபர்கள் செல்லுபடியாகும் விசாக்களுடன் இந்தியாவிற்குள் நுழைந்திருந்தாலும், அனுமதி இன்றி மிசோரம் பகுதிக்கு சென்றதாகவும், அங்கு இந்தியாவிற்கு விரோதமான குழுக்களுடன் தொடர்பு கொண்டதாகவும் விசாரணையில் தெரியவந்துள்ளது.
மேலும், ஐரோப்பாவில் இருந்து ட்ரோன் உபகரணங்களை மிசோரத்திற்கு கொண்டு வந்ததும் கண்டறியப்பட்டுள்ளது.பின்னர் டெல்லிக்கு அழைத்து வரப்பட்ட அவர்கள் நீதிமன்றத்தில் முன்னிலைப்படுத்தப்பட்ட நிலையில், ஆரம்பத்தில் மூன்று நாட்கள் நீதிமன்றக் காவலில் வைக்கப்பட்டதுடன், பின்னர் மார்ச் 27ஆம் திகதி வரை காவல் நீட்டிக்கப்பட்டுள்ளது.எல்லைத் தாண்டிய அச்சுறுத்தல்களுடன் தொடர்புடைய இந்த குழு பயங்கரவாதத் தாக்குதல்களைத் திட்டமிட்டதாக தேசிய புலனாய்வு முகமை குற்றம் சாட்டியுள்ளது.
