இந்தியாவின் ஒடிசா மாநிலத்தில் பாதுகாப்புப் படையினரின் தொடர்ச்சியான நடவடிக்கையையடுத்து 11 மாவோயிஸ்ட்கள் ஆயுதங்களுடன் சரணடைந்துள்ளனர்.ஒடிசா மாநிலத்தின் பஸ்தாரா–கும்சர் பகுதிக்குட்பட்ட கலாஹண்டி, ராயகடா மற்றும் கந்தமால் மாவட்டங்களில் மாவோயிஸ்ட்களின் ஆதிக்கம் நீண்ட காலமாக இருந்து வந்தது. இந்தப் பகுதிகளில் பாதுகாப்புப் படையினர் தொடர்ந்து தேடுதல் நடவடிக்கைகளை மேற்கொண்டு வந்ததுடன், மாவோயிஸ்ட்கள் சரணடையவும் ஊக்குவிக்கப்பட்டு வந்தனர்.
இந்நிலையில், அப்பகுதியில் மண்டலக் குழு உறுப்பினராக செயல்பட்டு வந்த மூத்த மாவோயிஸ்ட் தலைவர் நகுல் உள்ளிட்ட 11 பேர், மாநில காவல்துறைத் தலைவர் குரானியாவின் முன்னிலையில் ஆயுதங்களை ஒப்படைத்து சரணடைந்தனர்.நகுல் குறித்து தகவல் வழங்குவோருக்கு 22 லட்சம் ரூபாய் பரிசுத் தொகை அறிவிக்கப்பட்டிருந்தது.
மேலும் சரணடைந்த மற்ற ஐந்து பேரைப் பற்றிய தகவல்களுக்கு மொத்தமாக 63.25 லட்சம் ரூபாய் பரிசுத் தொகை அறிவிக்கப்பட்டிருந்ததாக அதிகாரிகள் தெரிவித்தனர்.சரணடைந்த மாவோயிஸ்ட்கள் ஏ.கே.–47, இன்சாஸ் துப்பாக்கி, எஸ்.எல்.ஆர் துப்பாக்கி உள்ளிட்ட 11 ஆயுதங்களை பாதுகாப்புப் படையினரிடம் ஒப்படைத்துள்ளனர்.
இந்த நிகழ்வில் கருத்து தெரிவித்த மாநில காவல்துறைத் தலைவர் குரானியா, “நகுல் போன்ற மூத்த மாவோயிஸ்ட்கள் சரணடைந்தது அந்த இயக்கம் பலவீனமடைந்துள்ளதை காட்டுகிறது. பாதுகாப்புப் படையினரின் தொடர்ந்து மேற்கொள்ளப்பட்ட நடவடிக்கைகளால் ஒடிசாவில் மாவோயிஸ்ட் இயக்கம் குறிப்பிடத்தக்க வகையில் குறைந்துள்ளது” என தெரிவித்தார்.
