பீகார் மாநில முதல்வர் நிதிஷ் குமாரின் மகன் நிஷாந்த் குமார் (50) நேற்று ஐக்கிய ஜனதா தள கட்சியில் உறுப்பினராக இணைந்துள்ளார். அவரை மாநிலத்தின் துணை முதல்வராக நியமிக்க கட்சியின் சட்டமன்ற உறுப்பினர்கள் மற்றும் நாடாளுமன்ற உறுப்பினர்கள் முடிவு செய்துள்ளதாக தகவல்கள் வெளியாகியுள்ளன.
பீகாரில் கடந்த ஆண்டு நடைபெற்ற சட்டப்பேரவைத் தேர்தலில் தேசிய ஜனநாயக கூட்டணி பெரும் வெற்றி பெற்றது. இதனைத் தொடர்ந்து நிதிஷ் குமார் 10வது முறையாக பீகார் முதல்வராக பதவியேற்றார்.இந்நிலையில் அவரது உடல்நிலையில் ஏற்பட்ட பாதிப்பை தொடர்ந்து, தனது மகன் நிஷாந்த் குமாரை கட்சியின் அடுத்த தலைமையாக கொண்டு வர முடிவு செய்ததாக கூறப்படுகிறது.
இதுகுறித்து பாரதிய ஜனதா கட்சியுடனும் ஆலோசனை நடத்தப்பட்டதாக தகவல்கள் தெரிவிக்கின்றன.அதன்படி நிதிஷ் குமார் மாநிலங்களவைத் தேர்தலில் போட்டியிடவும், நிஷாந்த் குமாரை ஐக்கிய ஜனதா தளத்தில் இணைத்து துணை முதல்வராக்கவும், முதல்வர் பதவியை பாரதிய ஜனதா கட்சிக்கு வழங்கவும் திட்டமிடப்பட்டதாக கூறப்படுகிறது. இதனைத் தொடர்ந்து நிதிஷ் குமார் மாநிலங்களவைத் தேர்தலில் போட்டியிட மனு தாக்கல் செய்துள்ளார்.
அரசியலில் இதுவரை இருந்து விலகி இருந்த நிஷாந்த் குமார் நேற்று அதிகாரப்பூர்வமாக ஐக்கிய ஜனதா தளத்தில் இணைந்தார். இந்த நிகழ்வில் கட்சியின் செயல் தலைவரும் மாநிலங்களவை உறுப்பினருமான சஞ்சய் ஜா, பீகார் துணை முதல்வர் விஜய் சௌத்ரி மற்றும் பல மூத்த தலைவர்கள் கலந்து கொண்டனர்.கட்சியில் இணைந்த பின்னர், நிஷாந்த் குமார் தலைமையகத்திற்கு வெளியே உள்ள ஜெயப்பிரகாஷ் நாராயண் சிலைக்கு மாலை அணிவித்து மரியாதை செலுத்தினார்.
பின்னர் ஊடகங்களுக்கு கருத்து தெரிவித்த அவர், “கட்சியின் தீவிர உறுப்பினராக செயல்பட்டு கட்சியின் நலனுக்காக பணியாற்றுவேன். மாநிலங்களவைத் தேர்தலில் போட்டியிட என் தந்தை எடுத்த முடிவை மதிக்கிறேன்” என தெரிவித்தார்.இதுகுறித்து கட்சியின் மூத்த தலைவர் ஹரி நாராயண் சிங் கூறுகையில், நிதிஷ் குமார் தலைமையில் நடைபெற்ற கூட்டத்தில் நிஷாந்த் குமாரை துணை முதல்வராக்க கட்சியின் சட்டமன்ற உறுப்பினர்களும் நாடாளுமன்ற உறுப்பினர்களும் ஒருமனதாக முடிவு செய்ததாக தெரிவித்தார்.
