தமிழகத்தில் நாளை (மார்ச் 8) அதிகபட்ச வெப்பநிலை வழக்கத்தை விட சுமார் 5 டிகிரி ஃபாரன்ஹீட் வரை உயரக்கூடும் என சென்னை வானிலை ஆய்வு மையம் தெரிவித்துள்ளது.இது தொடர்பாக வெளியிடப்பட்ட செய்திக் குறிப்பில், தென்னிந்திய பகுதிகளின் மேல் வளிமண்டல கீழடுக்கு சுழற்சி நிலவுகிறது என்று கூறப்பட்டுள்ளது. இதன் தாக்கத்தால், நாளை நீலகிரி மற்றும் கோவை மாவட்ட மலைப்பகுதிகளில் ஓரிரு இடங்களில் லேசான மழை பெய்ய வாய்ப்பு உள்ளது.
மார்ச் 9ஆம் தேதி மேற்கு தொடர்ச்சி மலை மாவட்டங்கள் மற்றும் தமிழக கடலோர மாவட்டங்களில் சில இடங்களிலும், மார்ச் 10ஆம் தேதி தென் தமிழக மாவட்டங்களில் சில இடங்களிலும் லேசானது முதல் மிதமான மழை பெய்யக்கூடும். மார்ச் 11ஆம் தேதி ஓரிரு இடங்களிலும், மார்ச் 12 மற்றும் 13ஆம் தேதிகளில் தென் தமிழக கடலோர மாவட்டங்களில் சில இடங்களிலும் லேசான மழை பெய்ய வாய்ப்பு இருப்பதாகவும் தெரிவிக்கப்பட்டுள்ளது.
தமிழகம், புதுச்சேரி மற்றும் காரைக்கால் பகுதிகளில் நாளை அதிகபட்ச வெப்பநிலை சில இடங்களில் வழக்கத்தை விட அதிகமாக இருக்கும் எனவும் குறிப்பிடப்பட்டுள்ளது.சென்னை மற்றும் புறநகர் பகுதிகளில் வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை சுமார் 99 டிகிரி ஃபாரன்ஹீட், குறைந்தபட்ச வெப்பநிலை சுமார் 77 டிகிரி ஃபாரன்ஹீட் அளவில் இருக்கும் என வானிலை ஆய்வு மையம் தெரிவித்துள்ளது.
