கோவை கல்லூரி மாணவி கூட்டுப் பாலியல் வன்கொடுமை வழக்கு: மூவருக்கும் இறப்பு வரை சிறைத் தண்டனை.!
கோவையில் கல்லூரி மாணவி ஒருவர் கூட்டுப் பாலியல் வன்கொடுமை செய்யப்பட்ட வழக்கில் கைது செய்யப்பட்ட மூவருக்கும் நீதிமன்றம் சாகும் வரை ஆயுள் தண்டனை விதித்துள்ளது.கடந்த ஆண்டு நவம்பர் 2ஆம் தேதி இரவு, கோவை பீளமேடு விமான நிலையம் அருகே மாணவி ஒருவர் தனது ஆண் நண்பருடன் பேசிக் கொண்டிருந்த போது, அங்கு வந்த மூவர் ஆண் நண்பரை தாக்கி, மாணவியை கூட்டுப் பாலியல் வன்கொடுமை செய்ததாக கூறப்படுகிறது.
இந்தச் சம்பவம் தொடர்பாக கருப்பசாமி, அவரது தம்பி காளீஸ்வரன் மற்றும் தவசி ஆகிய மூவரை போலீசார் கைது செய்தனர். வழக்கு கோவை அனைத்து மகளிர் நீதிமன்றத்தில் விசாரணைக்கு வந்தது.விசாரணை முழுமையாக நடைபெற்றதுடன், 270 பக்க குற்றப்பத்திரிகை தாக்கல் செய்யப்பட்டது.
பாதிக்கப்பட்ட மாணவி, அவரது ஆண் நண்பர், உறவினர்கள் மற்றும் விசாரணை அதிகாரிகள் உள்ளிட்ட 112 சாட்சிகள் சேர்க்கப்பட்டனர்.72 பேர் நீதிமன்றத்தில் நேரில் ஆஜராகி சாட்சியம் அளித்தனர். தடயவியல் மற்றும் டிஎன்ஏ பரிசோதனை அதிகாரிகள் காணொலி வாயிலாக சாட்சி வழங்கினர்.
விசாரணை முடிவடைந்ததைத் தொடர்ந்து, நீதிபதி சுந்தரராஜன் இன்று (மார்ச் 7) தீர்ப்பளித்தார். குற்றச்சாட்டுகள் உறுதிப்படுத்தப்பட்ட நிலையில், மூவருக்கும் சாகும் வரை ஆயுள் தண்டனை விதிக்கப்பட்டது.இந்தத் தீர்ப்பு பாதிக்கப்பட்டவர்களுக்கு நீதியை உறுதிப்படுத்தும் முக்கியமான முடிவாக கருதப்படுகிறது.
