தமிழகத்தின் நாங்குநேரி அருகிலுள்ள பெரும்பத்து கிராமத்தில் இடம்பெற்ற இரட்டை கொலைச் சம்பவத்துடன் தொடர்புடையவர்களில் கைது செய்யப்பட்டோரின் எண்ணிக்கை 8 ஆக உயர்ந்துள்ளது.கடந்த 2ஆம் திகதி இடம்பெற்ற இந்தச் சம்பவத்தில், ஒரு கும்பல் அரிவாளால் தாக்கியதில் ஒடிசா மாநிலத்தைச் சேர்ந்த தொழிலாளி திரிநாத் கட்டா மற்றும் பெரும்பத்து பகுதியைச் சேர்ந்த மாற்றுத்திறனாளி ஜான் ஆகியோர் கொலை செய்யப்பட்டனர்.
இந்தச் சம்பவம் தொடர்பாக முதற்கட்டமாக 7 பேரை பொலிஸார் கைது செய்திருந்த நிலையில், மஞ்சங்குளம் பகுதியைச் சேர்ந்த மகாராஜன் என்பவர் நேற்று கைது செய்யப்பட்டுள்ளார். இதன் மூலம் கைது செய்யப்பட்டோரின் எண்ணிக்கை 8 ஆக உயர்ந்துள்ளது. மேலும் சிலரை பொலிஸார் தேடி வருகின்றனர்.இதற்கிடையில், சம்பவத்தில் தொடர்புடைய அனைவரையும் கைது செய்யும்வரை உடலைப் பெற்றுக்கொள்ள மறுத்து, உயிரிழந்தவரின் உறவினர்கள் மற்றும் பொதுமக்கள் தொடர்ந்து போராட்டத்தில் ஈடுபட்டு வருகின்றனர். இந்தப் போராட்டம் நேற்று நான்காவது நாளாகவும் தொடர்ந்தது.
இதேவேளை, ஒடிசா மாநிலத்தைச் சேர்ந்த தொழிலாளி திரிநாத் கட்டாவின் உடல் ஏற்கெனவே அடக்கம் செய்யப்பட்டுள்ளதாக தெரிவிக்கப்படுகிறது.இந்நிலையில், நாங்குநேரி சம்பவம் தொடர்பாக உயர்நீதிமன்றத்தில் வழக்கறிஞர் ஆயிரம் கே. செல்வகுமார் முன்னிலையாகி, காரணமின்றி கொலை செய்யப்பட்ட புலம்பெயர் தொழிலாளியின் குடும்பத்திற்கு உரிய நிவாரணம் வழங்கவும், குற்றவாளிகளுக்கு கடுமையான நடவடிக்கை எடுக்கவும் நீதிமன்றம் தாமாக முன்வந்து வழக்குப் பதிவு செய்து விசாரிக்க வேண்டும் என கோரிக்கை விடுத்தார்.இதனைத் தொடர்ந்து, சம்பவம் தொடர்பாக தமிழக அரசின் நிலைப்பாடு குறித்து தகவல் பெற்று நீதிமன்றத்திற்கு அறிவிக்குமாறு அரசு தரப்பு வழக்கறிஞருக்கு நீதிபதிகள் உத்தரவிட்டுள்ளனர்.
