நான்கு பெரிய மாநிலங்களின் பொருளாதார வளர்ச்சியில் பின்தங்கிய மகாராஷ்டிரா, முன்னேறிய தமிழகம்!

இந்தியாவின் நான்கு மிகப்பெரிய பொருளாதார மாநிலங்களில் கடந்த நான்கு ஆண்டுகளில் மகாராஷ்டிரா மாநிலம் மிகக் குறைந்த பொருளாதார வளர்ச்சியைப் பதிவு செய்துள்ளது. இருப்பினும், ஒட்டுமொத்த மாநில உள்நாட்டு உற்பத்தி (ஜிஎஸ்டிபி) அடிப்படையில் அந்த மாநிலமே இன்றும் முதலிடத்தில் உள்ளது.

2024–25 நிதியாண்டில் மகாராஷ்டிராவின் மொத்த மாநில உள்நாட்டு உற்பத்தி ரூ.42,67,771 கோடி என கணிக்கப்பட்டுள்ளது. வளர்ச்சி விகிதத்தின் அடிப்படையில் கர்நாடகம், குஜராத் மற்றும் தமிழ்நாடு மாநிலங்களை விட அது பின்தங்கியுள்ளது.
கொரோனா காலத்திற்குப் பிந்தைய சூழலில் (2021–22 முதல் 2024–25 வரை), கர்நாடகம் சுமார் 65 சதவீத வளர்ச்சியுடன் முதலிடத்தில் உள்ளது.

பெங்களூரை மையமாகக் கொண்ட தகவல் தொழில்நுட்பம் மற்றும் சேவைத் துறைகளின் விரைவான வளர்ச்சியே இதற்குக் காரணமாகக் கூறப்படுகிறது. கர்நாடகத்தின் ஜிஎஸ்டிபி ரூ.17,02,227 கோடியிலிருந்து ரூ.28,09,063 கோடியாகஉயர்ந்துள்ளது.
தொழில் மற்றும் உற்பத்தித் துறையில் வலுவாக உள்ள குஜராத் மாநிலம் 48 சதவீத வளர்ச்சியைப் பதிவு செய்து இரண்டாம் இடத்தில் உள்ளது. அந்த மாநிலத்தின் பொருளாதார மதிப்பு ரூ.18,79,826 கோடியிலிருந்து ரூ.27,90,000 கோடியாக அதிகரித்துள்ளது.

மூன்றாவது இடத்தில் உள்ள தமிழ்நாடு சுமார் 47 சதவீத வளர்ச்சியை எட்டியுள்ளது. 2021–22 ஆம் ஆண்டில் ரூ.21,36,351 கோடியாக இருந்த தமிழ்நாட்டின் ஜிஎஸ்டிபி, 2024–25 ஆம் ஆண்டில் ரூ.31,55,096 கோடியாக உயர்ந்துள்ளது. இதன் மூலம் மொத்த பொருளாதார அளவில் மகாராஷ்டிராவுக்கு அடுத்தபடியாக தமிழ்நாடு வலுவான போட்டியாளராக உருவெடுத்துள்ளது.