ஈரானுடனான மோதல் தீவிரமடைந்துள்ள நிலையில், இந்திய சுத்திகரிப்பு நிறுவனங்கள் ரஷ்ய எண்ணெயை வாங்குவதற்கு அமெரிக்கா 30 நாட்கள் தற்காலிக விலக்கு வழங்கியுள்ளது.வளைகுடா பகுதியில் நிலவும் பதற்றம் காரணமாக ஹார்முஸ் நீரிணை வழியாக செல்லும் கப்பல் போக்குவரத்து பாதிக்கப்பட்டுள்ளதால் இந்த முடிவு எடுக்கப்பட்டுள்ளது.
உலகளாவிய எரிசக்தி விநியோகத்தில் நிலைத்தன்மையை உறுதி செய்வதே இந்த தற்காலிக நடவடிக்கையின் நோக்கம் என அமெரிக்க கருவூலச் செயலாளர் ஸ்காட் பெசென்ட் தெரிவித்துள்ளார்.ஜனாதிபதி டொனால்ட் ட்ரம்பின் எரிசக்தி கொள்கைகளின் விளைவாக எண்ணெய் மற்றும் எரிவாயு உற்பத்தி இதுவரை இல்லாத அளவுக்கு உயர்ந்துள்ளதாகவும் தெரிவிக்கப்பட்டுள்ளது.
உலக சந்தையில் எண்ணெய் விநியோகம் தொடர அனுமதிக்கும் வகையில் இந்த விலக்குவழங்கப்பட்டாலும், இது குறுகிய காலத்திற்கான நடவடிக்கை மட்டுமே என்றும், ரஷ்ய அரசுக்கு குறிப்பிடத்தக்க நிதி ஆதாயம் அளிக்காது என்றும் அமெரிக்க தரப்பு கூறியுள்ளது.
இந்தியா அமெரிக்காவின் முக்கிய பங்காளி நாடு என்றும், புது தில்லி அமெரிக்க எண்ணெய் கொள்முதலை அதிகரிக்கும் என எதிர்பார்ப்பதாகவும் அதிகாரிகள் தெரிவித்துள்ளனர்.
மேற்கு ஆசியாவில் அதிகரித்து வரும் பதற்றங்கள் மற்றும் எரிசக்தி விநியோகத்தில் ஏற்படும் இடையூறுகளை கருத்தில் கொண்டு இந்த விலக்கு வழங்கப்பட்டதாகவும் தெரிவிக்கப்பட்டுள்ளது.இந்தியா தனது மசகு எண்ணெயின் சுமார் நாற்பது விழுக்காட்டை இப்பகுதியில் இருந்து இறக்குமதி செய்கிறது. அதில் பெரும் பகுதி ஹார்முஸ் நீரிணை வழியாக கொண்டு செல்லப்படுவது குறிப்பிடத்தக்கது.
