மேற்கு ஆசியா மற்றும் உக்ரைன் பகுதிகளில் நடைபெறும் போர்களுக்கு விரைவில் முடிவு காணப்பட வேண்டும் என்று இந்திய பிரதமர் நரேந்திர மோடி வலியுறுத்தியுள்ளார்.இந்தியாவுக்கு நான்கு நாள் அரசு முறைப் பயணமாக வந்துள்ள பின்லாந்து அதிபர் அலெக்சாண்டர் ஸ்டப்புடன் நேற்று நடைபெற்ற சந்திப்பின்போது, ராணுவ மோதல்களால் எந்தவொரு பிரச்சினைக்கும் தீர்வு காண முடியாது என்பதை பிரதமர் மோடி திட்டவட்டமாக தெரிவித்துள்ளார்.
இரு தலைவர்களும் இருநாட்டு உறவுகளை மேம்படுத்துவது குறித்து விரிவான பேச்சுவார்த்தை நடத்தினர். அதன் பின்னர் வெளியிடப்பட்ட ஊடக அறிக்கையில், இந்தியாவும் பின்லாந்தும் சட்டத்தின் ஆட்சி, பேச்சுவார்த்தை மற்றும் இராஜதந்திர வழிமுறைகளில் நம்பிக்கை கொண்ட நாடுகள் என மோடி குறிப்பிட்டார்.
உக்ரைன் பிரச்சினையாக இருந்தாலும் அல்லது மேற்கு ஆசியா போராக இருந்தாலும், அவற்றை விரைவில் முடிவுக்கு கொண்டு வருவதற்கான அமைதிப் முயற்சிகளுக்கு இந்தியா தொடர்ந்து ஆதரவளிக்கும் என்றும் அவர் தெரிவித்தார்.மேலும் இரு நாடுகளுக்கும் இடையில் மின்னணு மயமாக்கல், நிலைத்தன்மை, செயற்கை நுண்ணறிவு, ஆறாம் தலைமுறை தொலைத்தொடர்பு, தூய்மையான எரிசக்தி மற்றும் குவாண்டம் கணினி தொழில்நுட்பம் போன்ற துறைகளில் ஒத்துழைப்பை வலுப்படுத்தவும் இரு தரப்பும் இணக்கம் தெரிவித்தன.
அத்துடன் இந்தியா மற்றும் ஐரோப்பிய ஒன்றியத்திற்கிடையிலான தடையற்ற வர்த்தக ஒப்பந்தம், இந்தியா – பின்லாந்து வர்த்தகம், முதலீடு மற்றும் தொழில்நுட்ப ஒத்துழைப்பை மேலும் வலுப்படுத்தும் என பிரதமர் மோடி தெரிவித்தார்.
