இந்தியா முழுவதும் நேற்று ஹோலி பண்டிகை விமரிசையாகக் கொண்டாடப்பட்டது. மக்கள் வண்ணப் பொடிகளை ஒருவர்மீது ஒருவர் தூவி, வண்ண நீரைப் பீச்சி, திலகம் இட்டு மகிழ்ச்சியை வெளிப்படுத்தினர். இனிப்புகளை பரிமாறியும் கொண்டாடினர்.
புராண வரலாற்றின் அடிப்படையில் ஹோலி பண்டிகைக்கு முன்பாக ‘ஹோலிகா தஹன்’ என்ற சடங்கு நடைபெறுகிறது.
இதற்காக நகரங்களிலும் கிராமங்களிலும் முக்கிய சந்திப்புகளில் காய்ந்த மரக்கிளைகளை சேகரித்து குவிக்கின்றனர். பண்டிகை நாள் அதிகாலையில் சிறப்பு பூஜை செய்த பின் அந்த விறகுகள் எரிக்கப்படுகின்றன. தீ எரியும்போது மக்கள் மகிழ்ச்சியுடன் ஆர்ப்பரித்து, அந்தத் தீயை வீட்டிற்கு கொண்டு சென்று அடுப்பை மூட்டுவது வழக்கம்.
இந்தச் சடங்குடன் ஹோலி பண்டிகை தொடங்குகிறது.
உத்தரப் பிரதேச மாநிலத்தில் உள்ள மதுரா நகரில் ஹோலி பண்டிகைமிகவும் பிரசித்தி பெற்றது. அங்கு சுமார் பத்து நாட்களுக்கு முன்பே கொண்டாட்டங்கள் தொடங்கிவிடுகின்றன. பிருந்தாவனில் உள்ள புகழ்பெற்ற பாங்கே பிஹாரி கிருஷ்ணர் கோயிலில் நடைபெறும் வண்ண மழை ஹோலி உலகப் புகழ் பெற்றதாகும்.
பர்ஸானா பகுதியில் பெண்கள் ஆண்களைத் தடியால் அடித்து விளையாடும் பாரம்பரிய ஹோலியும் சிறப்பாக நடைபெறுகிறது. சில பகுதிகளில் மறுநாள் சேற்று மண் வீசி ஹோலி கொண்டாடும் வழக்கமும் உள்ளது.
உத்தரப் பிரதேசம், பிஹார், மத்தியப் பிரதேசம் உள்ளிட்ட வடமாநிலங்களில் ஹோலி பண்டிகை தனித்துவமான முறையில் கொண்டாடப்பட்டது.
